Kryetari i Aleancës për Ardhmërinë e Kosovës (AAK), Ramush Haradinaj, ka ftuar bashkëluftëtarët që të kenë kujdes gjatë udhëtimeve të tyre.

Haradinaj përmes një reagimi në Facebook, ka thënë se Serbia ka riaktualizuar përndjekjen e qytetarëve të Kosovës.

"Serbia në kuadër të luftës speciale kundër vendit tonë, ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së", ka thënë Haradinaj.

Reagimi i plotë:

Të nderuar bashkëluftëtarë,

Serbia në kuadër të luftës speciale kundër vendit tonë, ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së.

Fatkeqësisht, Serbia ka arritur t'i shtrijë tentakulat e saj edhe në disa vende të rajonit si dhe po i shfrytëzon përparësitë e veta si anëtare e Interpol dhe organizatave të tjera ndërkombëtare, për ndjekje ligjore në vendet jashtë Kosovës. Një model i tillë ishte aplikuar me rastin e ndalimit tim në Francë dhe Slloveni.

Prandaj ju këshilloj që të bëni kujdes gjatë udhëtimeve tuaja.