Janë hapur dyert e Muzeut të të Mbijetuarve të Dhunës Seksuale gjatë luftës së fundit në Kosovë.

Në hapësirën me dhoma të vogla rrëfehen përmes artit kujtimet e të mbijetuarve të dhunës seksuale gjatë luftës së fundit të Kosovës.

Autorja e muzeut "Çast", Eliza Hoxha tha se të mbijetuarat e dhunës seksuale kanë përjetuar ndjenja të përjashtimit dhe stigmatizimit.

"Pse moment? Jeta jonë është një grumbull i momenteve, mund të jenë të ëmbla dhe më pak të ëmbla. Ka qenë një moment që këtyre të mbijetuarve u ka ndryshuar jetën, por ka qenë shumë momente që ua kemi rënduar jetën në paqe, nuk ua kemi njohur dhimbjen", tha ajo.

Ky muze i vogël, siç e quajti ajo, fton të gjithë që të mendohet dhe nxiten ato.

Ideatorja e këtij muzeu dhe themeluesja e Fondacionit Jahjaga, Atifete Jahjaga, u shpreh se rëndësia e këtij muzeu shkon përtej përkujtimit.

"Muzeu që inaugurojmë sot është dëshmi e vuajtjes së atyre që për një kohë të gjatë janë lënë në harresë. Është një amanet të cilin ua lejmë brezave. Zemra më dhëmb kur mendoj që rrëfimet e viktimave kanë mbetur në muret e tyre. Kur mendoj për ata dhe ato që kanë marrë me veti në varr pa parë dritë. Rëndësia e këtij muzeu shkon përtej përkujtimit", tha ish-presidentja Jahjaga.