Edicioni i 9-të i tre ekspozitave Ndërkombëtare të Panairit të Plovdivit - Agra, Vinaria dhe Foodtech, u hap të martën në Plovdiv, Bullgari jugore.

Foodtech është ekspozita ndërkombëtare për ushqim dhe pije, paketim, makineri dhe teknologji, duke paraqitur më të mirat e industrisë ushqimore: produkte të pastra dhe të shëndetshme; gastronomi moderne; teknologjitë moderne të përpunimit dhe ruajtjes; demonstrime, degustime dhe klasa master (klasa që mbahen nga ekspertë të kësaj disipline).

Një pjesë thelbësore e ekspozitës është një zonë ku ekspozohen pajisjet për përpunimin e lëndëve të para, për prodhimin e ushqimit, për klasifikimin, paketimin dhe etiketimin dhe mbahen demonstrime. Një zonë e caktuar, Qyteti i Verës dhe Delikatesave, i ngritur si pjesë e ekspozitës po zgjeron vazhdimisht territorin e saj.

Agra aspiron të jetë një qendër tregtare për agrobiznesin në Evropën Juglindore. Ekspozita mbulon të gjitha aspektet dhe sektorët e bujqësisë: kërkimin shkencor, punën praktike, teknologjitë, pajisjet, produktet, inovacionet dhe shërbimet. Ajo tërheq prodhuesit dhe tregtarët kryesorë. Ekspozita është burimi i parë i informacionit për fermerët rreth produkteve dhe shërbimeve, një treg për makineri dhe pajisje dhe një vend për të ndarë idetë dhe përvojat.

Vinaria është një ekspozitë ndërkombëtare e vreshtarisë dhe prodhimit të verës dhe pretendon të jetë platforma më prestigjioze për industrinë e verës në Evropën Juglindore. Ajo paraqet një përzgjedhje të pasur pijesh: nga produktet tradicionale vendase te markat globale, nga shijet e njohura deri te shijet e reja dhe shijet moderne në katalogët e verërave dhe pijeve alkoolike. Pjesëmarrësit sjellin këtu produktet dhe risitë e tyre që paraqet në fushën e varieteteve të rrushit, metodat dhe pajisjet e përpunimit dhe sistemet e kontrollit të cilësisë.

Ekspozitat mbahen nën kujdesin e Ministrisë së Bujqësisë.

Në fjalën e saj në hapjen e tri ekspozitave, nënkryetarja Iliana Iotova tha se duhet "një politikë bujqësore e përbashkët, e madhe, e zgjuar, e thellë dhe e arsyeshme, që të mendojmë edhe për të ardhmen". Ajo tha se të gjithë prodhuesit bujqësorë në Evropë kanë nevojë për një politikë të tillë.

Ajo tha se Marrëveshja e Gjelbër "është e mirë, por nuk duhet të shkaktojë ndonjë dëm dhe duhet të ofrojë mundësi për zhvillim", si dhe të ndihmojë prodhuesit të merren me konkurrencën nga vendet e treta që nuk kanë rregulla të ashpra evropiane.

Ajo tha se fermerët bullgarë dhe evropianë "nuk janë terroristë, por njerëz që duan të mbrojnë punën e tyre". "Kjo është arsyeja pse ne nuk duhet të zemërohemi me protestuesit, por t'i mbështesim ata kur kërkesat e tyre janë të drejta," shtoi ajo.

Iotova përgëzoi ministrin e bujqësisë Kiril Vatev për mbështetjen e prodhuesve bullgarë në luftën e tyre për më shumë produkte bullgare në treg.

"Është turp për një vend bujqësor si Bullgaria të importojë 80% të prodhimit të tij," tha Iotova./BTA-KosovaPress