Ish-presidenti i Malit të Zi, Milo Gjukanoviq, ka njoftuar institucionet kompetente se ka marrë informacione se ndaj tij po planifikohet një atentat, thuhet në njoftimin e zyrës së tij.

Lajmin e ka publikuar portali Vijesti. Mbrëmë vonë, administrata policore u tha atyre se aktualisht nuk ka ndonjë informacion që do të tregonte aktivitete të planifikuara që synojnë të rrezikojnë sigurinë e Gjukanoviq. Agjencia e Sigurisë Kombëtare nuk bëri një njoftim.

“Ish-presidenti i ka marrë informacionet e lartpërmendura nga disa zyrtarë ndërkombëtarë nga komuniteti i inteligjencës dhe me këtë i ka njoftuar autoritetet shtetërore”, kanë thënë nga zyra e Gjukanoviq, por nuk kanë thënë se kujt dhe kur i janë dhënë këto informata Gjukanoviq.

Një burim i afërt me Gjukanoviq pretendon se një “zyrtar i lartë ushtarak i huaj nga Kosova” e ka informuar atë se një grup i organizuar kriminal nga një shtet fqinj dyshohet se po planifikon një atentat, në marrëveshje me shërbimet e sigurisë së një vendi tjetër fqinj.

“Sipas nenit 18 të Ligjit për Presidentin e Malit të Zi, me përfundimin e detyrës, Presidenti ka të drejtë në sigurim të përhershëm në përputhje me vlerësimin e sigurisë të përcaktuar nga organi kompetent, në përputhje me ligjin. Në përputhje me rregulloret pozitive, Agjencia e Sigurisë Kombëtare është përgjegjëse për raportin për vlerësimin e rrezikut të sigurisë”, tha Administrata e Policisë së Malit të Zi.

I pyetur nëse Gjukanoviq ka marrë siguri të shtuar, zyra e tij ka thënë se është zvogëluar. “Ndryshime në sigurime në atë periudhë kanë ndodhur deri në atë masë sa që është hequr sigurimi në vendbanimin e ish-presidentit gjatë turnit të ditës”, kanë thënë ata.

Ata thonë gjithashtu se sigurimi i Malit të Zi nuk e ka ftuar Gjukanoviqin për intervistë dhe as koordinatorin e sigurimit të tij.