Gjatë shtatë ditëve 28 fëmijë me sëmundjet të zemrës do të trajtohen nga ekipe të huaja
Sot, në amfiteatrin klinik të Pediatrisë, U. D. Ministrja e Shëndetësisë, dr. Dafina Gexha Bunjaku mori pjesë në mbledhjen solemne me rastin e fillimit të misioneve përkrahur nga ShBA “Gift of Life International” dhe Holanda “Princess Maxima Hospital Holand”.
“Dr. Gexha falënderoi dy organizatat për kontributin e tyre në trajtimin e fëmijëve me sëmundje të lindura të zemrës dhe të atyre me sëmundje malinje, duke theksuar se me vite jeni duke shpëtuar dhe ndihmuar shumë fëmijë për të cilët nuk ka qenë i mundur trajtimi i tyre nga ana e profesionistëve tanë, qoftë për shkak të mungesës së kapaciteteve humane apo atyre teknike dhe në këtë mënyrë është plotësuar një hendek i menaxhimit klinik të rasteve. "Falë humanizmit të secilit nga ju, iu është kthyer buzëqeshja shumë voglushëve në Kosovë, dhe nuk ka dyshim që gjatë kësaj pune humane profesionistët tonë shëndetësorë kanë përfituar nga dituria dhe përvoja e profesionistëve shëndetësorë të ardhur në Kosovë". Ky angazhim vetëmohues ndërlidhet edhe me ftesën e Ministrise se Shëndetësisë drejtuar profesionistëve shëndetësor nga mërgata dhe jashtë vendit”, thuhet në njoftimin e MSh-së.
"Ne synojmë që këto kapacitete që ju po na i ofroni, ne do t’ i orientojmë në përgatitjen profesionale, por edhe në atë menaxheriale të profesionistëve tonë qoftë duke u trajnuar këtu apo edhe në institucionet shëndetësore jashtë vendit", tha dr. Gexha.
Ky mision ka për qëllim që gjatë këtyre shtatë ditëve të trajtojë 28 fëmijë me sëmundjet e lindura të zemrës, diagnostikimin dhe trajtimin e fëmijëve me sëmundje në Repartin hemato-onkologjik në Pediatri si dhe edukimin e personelit shëndetësor.
