Golashënuesi më i mirë në historinë e futbollit francez Olivier Giroud (37), i ka dhënë lamtumirën kombëtares së tij.

“Ka ardhur momenti që më tremb, duke i dhënë lamtumirën kombëtares franceze. Karriera ime në fanellën franceze nuk ka qenë gjithmonë një lumë i gjatë dhe i qetë, ndonjëherë kam vuajtur nga kritikat, por thellë brenda vetes nuk kam pushuar kurrë së besuari në të”, ka shkruar ai në Instagram.

Me fanellën e Francës, ai fitoi titullin e botës më 2018, argjendin e botës katër vjet më vonë, argjendin evropian më 2016 dhe Ligën e Kombeve më 2021.

“Ne u bëmë një grup i pandashëm miqsh nën syrin vigjilent të një njeriu, Didier Deschamps, të cilin e falënderoj për besimin e tij. Ai më lejoi të bëhem golashënuesi më i mirë në historinë e të kaltërve”, tha Giroud, i cili do të luajë për Los Angeles nga sezoni i ardhshëm.