Gazetarja serbe në Kosovë: Kremlini po e ndez një luftë tjetër në Ballkan për të larguar vëmendjen nga Ukraina

Gazetarja serbe në Kosovë: Kremlini po e ndez një luftë tjetër në Ballkan për të larguar vëmendjen nga Ukraina

Kremlini duke përdorur disa nga radikalët serbë, kërkon të ndez një luftë tjetër në Ballkan me qëllim të largimit të vëmendjes nga Ukraina.

Kështu thekson gazetarja serbe Vesna nga Balkanswer, e cila nuk dëshiron të identifikohet, duke shtuar se Moska po e përdor qeverinë e Serbisë për të rritur tensionet në rajon.

Sipas saj, serbët në Kosovë i kanë të gjitha të drejtat, më shumë se çdo popull tjetër në rajon.

“Serbët i kanë të gjitha të drejtat në Kosovë, më shumë se çdo komb tjetër në Evropë. Ato rregullohen nga kushtetuta e vendit”, thekson gazetarja serbe nga Kosova për median ukrainase Gazeta.

Vesna tregon se roli i Rusisë në rajon është mjaftë shkatërrues.

“Serbët këtu [në Kosovë] nuk kanë autonomi. Nëse do të kishin një autonomi, mund të lindte një konflikt i ri. Rusët së bashku me lidershipin serb po kërkojnë një autonomi të tillë për serbët e Kosovës. Roli i Rusisë në rajon është përgjithësisht mjaft shkatërrues”, tregon Vesna.


Gazetarja shton se serbët e Kosovës duhet të pranojnë dokumentet zyrtare si të gjithë qytetarët në vend.

“Qeveria e Kosovës paralajmëroi se nëse hiqen barrikadat [të vendosura nga strukturat paralele serbe në veri], vendosja e reciprocitetit për targat dhe dokumentet do të shtyhet për një muaj. Serbët e Kosovës duhet të pranojnë dokumentet zyrtare të Kosovës, si të gjithë qytetarët tjerë në vend”, shton ajo.

Në fund, ajo tërheq vërejtjen se veriu i Kosovës kontrollohet nga krimineli serb Milan Radoiçiq.

“Kjo zonë kontrollohet nga krimineli serb Milan Radoiçiq, i cili është në listën e sanksioneve amerikane. Ai ka lidhje të forta me presidentin serb Aleksandar Vuçiq dhe të dy janë të lidhur me Vladimir Putinin”, përfundon ajo.

Vendim i Qeverisë së Kosovës për shtyrje të masës së reciprocitetit në rast të heqjes së barrikadave, erdhi pas një takimi që patën udhëheqësit e shtetit me ambasadorin amerikan Jeff Hovenier.

Vendimi i 29 qershorit i ekzekutivit kosovar parasheh lëshimin e dokumentit për hyrje-dalje për të gjithë personat që posedojnë dokumente serbe.

Lexo edhe

Video