Një person është vrarë dhe një tjetër është plagosur me thikë sot në Zllakuqan të Lipjanit, për çka dy persona janë arrestuar në cilësinë e të dyshuarve.

Ndërkaq, i plagosuri 15 vjeçar është dërguar në Klinikën Emergjente pranë Qendrës Klinike Universitare të Kosovës (QKUK).

Drejtori i Klinikës Emergjente, Naser Syla për KosovaPress tha se pas pranimit të tij, i plagosuri është transferuar në Klinikën Torakale në gjendje stabile.

Syla potencoi se i plagosuri është i lindur në vitin 2009.

"E kemi dërguar në Kirurgjinë Torakale, stabil e kemi dërguar, këtu i kemi kryer të gjitha çfarë ka qenë e nevojshme...(Pacienti) 2009-sh ishte", tha Syla.

Drejtori i Klinikës Torakale, Nazmi Kolgeci ka theksuar për KosovaPress se gjendja e pacientit është stabile dhe shtoi se është bërë një intervenim i vogël kirurgjik.

"Është pranuar para gjysmë ore ky rast. Faktikisht ka ardhur me një gjendje  shumë të rëndë mirëpo tash gjendja e pacientit është stabile. Është bërë një intervenim i vogël kirurgjik...Intervenimi është bërë në anën e majtë të gjoksit, është hematototoraks, për shkak të lëndimit nga mjetet e mprehta. Është bërë intervenimi kirurgjik në Qendrën Emergjente mandej është bërë transferimi kirurgjik në Torakale. Tash e tutje vazhdon tretmanin në klinikën tonë...Besoj që është jashtë rrezikut për jetë, lirisht mund ta konfirmoni", theksoi ai.

Rastin e ka konfirmuar edhe Policia e Kosovës.

https://kosovapress.com/nje-i-vrare-dhe-nje-i-plagosur-ne-zllakuqan-policia-jep-detaje