Përkundër se mori vetëm dy pikë nga dy ndeshjet e para, e sidomos dështimi për të fituar kundër Andorras, analistët e futbollit kosovar bëjnë thirrje që trajneri i Kombëtares së Kosovës Alain Giresse të mos shkarkohet. Ata konsiderojnë se një ndryshim eventual në stol në këtë moment nuk do të sillte diçka pozitive.

Trajneri Arsim Plepolli konsideron se Giresse duhet të lejohet ta vazhdojë punën e tij, po thekson se dikush duhet t’ia “tërheq veshin” për rezultatet e dobëta në këto dy ndeshje.

Tutje Plepolli ka thënë ka thënë për KosovaPress se në rezultatet negative të kombëtares mund të kenë ndikuar edhe zhvillimet e fundit brenda federatës, të cilat, sipas tij, është dashur të shmangen.

Edhe analisti Genc Sermaxhaj, thotë për KosovaPress se tani nuk është momenti i duhur për të marr vendim për ndryshimin e trajnerit të kombëtares, sepse kush do që të vie në vend të tij do ta ketë të vështirë të bëjë diçka më shumë.

Ai nuk e përjashton mundësinë që zhvillimet e fundit brenda federatës mund të kenë ndikuar negativisht, por ka shtuar se lojtarët duhet të mos merren me gjërat që ndodhin jashtë fushës.

Edhe pse thotë se është i pakënaqur me punën dhe rezultatet e trajnerit francez, trajneri Granit Begolli, thotë se ndryshimi eventual në stolin e kombëtares nuk do të sillte rezultate për shkak të kohës shumë të shkurtër që ka mbetur në dispozicion.

Ndeshjen e radhës në kuadër të kualifikimeve për në Kampionatin Evropian Euro 2024 Kosova do ta zhvillojë në Prishtinë kundër Romanisë më 16 qershor.