Edhe dhjetë orë pas, nuk janë dhënë detajet për arsyet e arrestimit të ish-pjesëtarit të UÇK-së, Fadil Fazliut dhe dy të tjerëve, Isni Kilaj e Bashkim Smakaj.
Mëngjesin e së enjtes, EULEX-i ka kryer disa arrestime e bastisje në Kosovë për të cilat Prokuroria e Specializuar e Hagës ka thënë se kanë të bëjnë me vepra kundër administrimit të drejtësisë.
Ata janë dërguar në zyret e EULEX-it në Fushë Kosovë.
I biri i Fadil Fazliut, Fahriu tha se nuk është lejuar të takohet me të.
Ai para mediave tha se gjendja shëndetësore e tij është e mirë, mirëpo që në asnjë moment nuk i kanë treguar pse është arrestuar ai dhe se a do të dërgohet në qendrën e paraburgimit në Hagë.
“Nuk më lejuan të hyjë. Kërkova ta di për shëndetin e tij, por më thanë që është mirë, por që nuk mund të hysh pasi janë procedura të Dhomave të Specializuara të Hagës. Insistova, kërkova por më thanë që nuk më lejohet. Ai po vazhdon me intervistimin apo se çka kanë brenda. Nuk më dhanë diçka më shumë edhe pse kërkova disa herë”, tha ai.
Ai tregoi momentin e arrestimit të babait të tij derisa theksoi se EULEX s’ka bërë bastisje sot në banesën e tyre.
“Sot në mëngjes duke shkuar në punë, rreth orës 08:00 ka ndodhur arrestimi tij. Kanë qenë rreth 3-4 xhipa të EULEX-it, siç kanë treguar kojshia aty afër dhe është arrestuar", theksoi Fazliu.
Të enjten është raportuar për bastisje edhe në shtëpisë së ish-ministrit të Drejtësisë, Hajredin Kuçi.
Zyra e Prokurorit të Specializuar ka konfirmuar se po kryen operacione sot në Kosovë.
Sipas ZPS-së, procesi hetimor përqendrohet në vepra kundër administrimit të drejtësisë.
Përmes një njoftimi të lëshuar në faqen zyrtare, ZPS ka thënë se operacionet janë autorizuar nga ana gjyqësore e Dhomave të Specializuara dhe janë mbështetur nga EULEX-i.
