“Evropa duhet të jetë e hapur për Ballkanin Perëndimor”

“Evropa duhet të jetë e hapur për Ballkanin Perëndimor”

Kryeministri i Shqipërisë, Edi Rama mikpriti sot presidentin e Republikës Federale të Gjermanisë, Frank-Walter Steinmeier, i cili po zhvillon një vizitë zyrtare në Shqipëri. Ky i fundit tha se edhe qeveritë skeptike janë të bindura që duhet përshpejtuar procesi i zgjerimit të BE-së.

Sipas një komunikate të Qeverisë së Shqipërisë, në takimin që u zhvillua në zyrën e kryeministrit Rama e më pas u zhvendos në Sallën e Hartave për t’iu bashkuar edhe delegacionet respektive, u vlerësuan marrëdhëniet e shkëlqyera mes Shqipërisë e Gjermanisë dhe bashkëpunimi i ngushtë në nivel politik e diplomatik, bashkëpunimi i suksesshëm në luftën kundër krimit të organizuar e kundër korrupsionit, bashkëpunimi në fushën e mbrojtjes, arsimit, etj.

Kryeministri Rama vlerësoi rolin e Gjermanisë si një vend mik e partner gjithmonë mbështetës, në momente kyçe të rrugëtimit të Shqipërisë drejt integrimit europian.


“Jemi shumë mirënjohës ndaj Gjermanisë për çdo gjë që qeveritë e njëpasnjëshme gjermane kanë bërë për këtë marrëdhënie që është në nivelin e saj më të mirë mendoj. Sigurisht, duam të bëjmë më shumë, por do të thoja që deri më tani, mbështetja e Gjermanisë në të gjitha frontet ka qenë thelbësore për ne. E mendojmë që është shumë mirë të kemi një ministër të jashtëm si President në Gjermani sepse është shumë e dobishme, duke njohur terrenin, duke njohur njerëzit, duke njohur dinamikën në terren për të gjitha vendet, sidomos në këtë rajon, ku siç e dini kemi dhe Procesin e Berlinit që po vazhdon, që në një farë mënyre është riorganizuar, është ripërtërirë, ku falë këtij procesi kanë ndodhur shumë gjëra të mira për rajonin. ” – u shpreh Kryeministri Rama gjatë takimit.

Nga ana e tij, presidenti gjerman përgëzoi progresin e Shqipërisë në rrugëtimin drejt integrimit europian dhe theksoi se Gjermania do të jetë gjithnjë mbështetëse e këtyre hapave.

“Nuk me kujtohet se sa herë jemi ulur dhe diskutuar për rrugëtimin e Shqipërisë drejt Evropës, por vërtetë përgëzime që keni arritur një gur të rëndësishëm themeli për nisjen e negociatave për anëtarësim dhe kjo është diçka mendoj, për të cilën, ju keni punuar i mbështetur nga shumë prej anëtarëve tuaj të parlamentit dhe pjesa më e madhe e elitës politike këtu në Shqipëri dhe besoj kjo do të inkurajojë marrjen e hapave të mëtejshme që janë të nevojshme në rrugëtimin drejt Evropës. Kemi folur për reformat, kemi folur për reformën në sistemin e drejtësisë, luftën kundër korrupsionit, kështu që mendoj se progresi është i nevojshëm, progresi është i mundur. Jam tërësisht i bindur edhe pse kam qenë skeptik në të shkuarën se na duhet të konsiderojmë që Evropa, jo vetëm duhet të tregojë bashkim dhe vendosmëri, por po kështu duhet të jetë e hapur për zgjerimin e nevojshëm drejt Ballkanit Perëndimor. Për rrjedhojë jam mjaft optimist, e di që ka një lloj pengese për shkak të pritjes, deri sa anëtarësimi do të formalizohet. Përshtypja ime pra, është që edhe qeveritë skeptike janë ndërkohë të bindura që ne duhet ta përshpejtojmë procesin dhe kjo është gjë e mirë.” – u shpreh ndër të tjera presidenti i Republikës Federale të Gjermanisë Frank-Walter Steinmeier.

Lexo edhe

Video