Joe Kent, drejtori i Qendrës Kombëtare Kundër Terrorizmit, ka njoftuar dorëheqjen të martën, duke thënë se “nuk mundet me ndërgjegje të pastër” ta mbështesë luftën e administratës së Donald Trump ndaj Iranit.

Kent ka shkruar në rrjetet sociale se Irani “nuk paraqiste asnjë kërcënim të menjëhershëm për vendin tonë dhe është e qartë se ne e nisëm këtë luftë për shkak të presionit nga Izraeli dhe lobit të tij të fuqishëm amerikan”.

Kent, një ish-kandidat politik me lidhje me ekstremistë të krahut të djathtë, ishte konfirmuar në këtë post korrikun e kaluar me 52 vota pro dhe 44 kundër.

Si drejtues i Qendrës Kombëtare Kundër Terrorizmit, ai ishte përgjegjës për një agjenci që merret me analizimin dhe zbulimin e kërcënimeve terroriste.

Para se t’i bashkohej administratës së presidentit Donald Trump, Kent kishte garuar dy herë pa sukses për Kongres në shtetin e Uashingtonit. Ai gjithashtu ka shërbyer në ushtri, duke marrë pjesë në 11 dislokime si pjesëtar i Forcave Speciale (Green Beret), dhe më pas ka punuar në CIA, shkruan AP.

/Kosovapress/