Aventura e Angel Di Marias te Juventusi tani ka përfunduar.
Ndeshja ndaj Udineses ishte e fundit e yllit argjentinas në fanellën e Juventusit, ku pas një viti ish-futbollisti i Paris Saint-Germain largohet nga skuadra e Massimiliano Allegrit, raporton KosovaPress.
Angel Di Maria i tha lamtumirë Juventusit përmes një mesazhi që e publikoi në rrjetin social të tij në “Instagram”.
“Unë e kam arritur një fund të një faze të vështirë dhe të komplikuar. Largohem me qetësinë e atyre që dhanë gjithçka për të ndihmuar klubin të vazhdojë të fitojë tituj, por nuk ishte e mundur”, tha Di Maria.
“Largohem me shijen e hidhur se nuk ia kam dalë, por me lumturinë që kam sjellë me vete shumë miq nga kjo dhomë e mrekullueshme e zhveshjes, pjesë e së cilës kam qenë. Faleminderit të gjithë shoqëruesve të mi për dashurinë që më kanë rezervuar që nga dita e parë, jam ndjerë gjithmonë si në shtëpinë time. Një përshëndetje e madhe për të gjithë Juventusin për dashurinë e tyre të përditshme. Një përqafim i madh. Unë të mbaj në zemrën time”, shkroi më tej Di Maria.
