Dhjetëra të vdekur nga shpërthimi në Iran
Të paktën 51 punëtorë kanë humbur jetën nga një shpërthim në një minierë qymyri në Iranin verilindor, sipas mediave lokale të dielën.
Shpërthimi u shkaktua nga një lëshim i shpejtë i metanit dhe monoksidit të karbonit të shtunën mbrëma në dy blloqe në minierën në Tabas në provincën Khorasan.
Autoritetet lokale thanë se rreth 70 punëtorë ndodheshin në minierë në momentin e shpërthimit.
Shpërthimet kanë ndodhur në blloqet B dhe C të minierës, të menaxhuar nga një kompani private, në një thellësi prej rreth 200 metrash.
Autoritetet përmendën vështirësi në kryerjen e një operacioni të shpejtë shpëtimi për shkak të kushteve nëntokësore.
Ministri i Industrisë Mohammad Atabak, tha se kompania private që mbikëqyr operacionet minerare në Tabas është nën hetim, duke shtuar se do të formohet një komision për të hetuar shkakun.
Në vitin 2017, dhjetëra minatorë kanë humbur jetën në një shpërthim në një minierë qymyri në provincën Golestan të Iranit verior.
Irani është një nga prodhuesit më të mëdhenj të mineraleve në botë, me mijëra miniera hekuri, bakri, ari, plumbi dhe qymyri, duke kontribuar ndjeshëm në prodhimin e tij të brendshëm bruto. /AA
