Buxheti i Kosovës për vitin 2025 shkon në Kuvend për shqyrtim pa votim në komision. Ministri i Financave, Hekuran Murati, tha se buxheti 3.6 miliardësh është i zhvillimit të Kosovës. Ndërkaq, gjatë prezantimit të buxhetit, deputetët nga opozita adresuan kritika ndaj qeverisë, derisa akuzuan partinë në pushtet për mos përmbushje të premtimeve.
Në mbledhjen e Komisionit për buxhet, deputeti nga Lidhja Demokratike e Kosovës, Avdullah Hoti prezantoi disa nga planet e qeverisë të cilat nuk janë realizuar.
Ministri i Financave, Hekuran Murati ka përkujtuar se asnjë projekt i madh nuk kryhet brenda një mandati qeverisës, teksa për ngecjen në projekte ka fajësuar kontraktuesit.
Ai para anëtarëve të komisionit prezantoi në detaje buxhetin, derisa tha inflacioni pritet të bie në Kosovë, që sipas tij kjo do të mundësojë rritjen ekonomike. Murati tha se në buxhet janë të parapara rritja e pensioneve, rritja e shtesave për fëmijë, rritja e njësive të koeficientit në sektorin publik.
