Borrell: Dialogu nuk do të jetë i lehtë, por duhet të vazhdojë

Përfaqësuesi i Lartë i Bashkimit Evropian për Politika të Jashtme dhe Politika të Sigurisë, Joseph Borrell, ka deklaruar se dialogu mes përfaqësuesve të Kosovës dhe Serbisë nuk do të jetë i lehtë, por duhet të vazhdojë.

Në një deklaratë për media, të dhënë pak çaste më parë, Borrell tha se dialogu duhet të vazhdojë pa vonesa dhe duhet të sjell rezultate të qarta.

Andaj, ai ka inkurajuar dy palët që të vazhdojnë angazhimin e tyre në këtë proces.

“Sot, në bashkëpunim me përfaqësuesin e lartë të BE-së, Miroslav Lajçak, do të zhvillojmë një takim të nivelit të lartë në dialog në mes të Prishtinës dhe Beogradit. Jam i lumtur që po ndodh një gjë e tillë në momentin që Bashkimi Evropian do të zhvillojë takim me presidentin amerikan, Joe Biden në Bruksel. Është kënaqësi të presim në Bruksel presidentin e Serbisë, Aleksandër Vuçiq dhe kryeministrin e Kosovës, Albin Kurti, pas vizitës së tyre në Bruksel në fund të prillit. Në këtë moment, i inkurajojmë të vazhdojnë të takimet e dialogut pa vonesa dhe të sjellin rezultate të qarta, pavarësisht krejt vështirësive. E di se dialogu nuk do të jetë i lehtë, por ky proces me angazhimin e dy palëve është i nevojshëm për të mirën e njerëzve në Kosovë dhe Serbi. Ta bëjmë të qartë se dialogu është më i miri për të ardhmen evropiane të dy vendeve. Në ndërkohë, ai ka sjellur rezultate të rëndësishme për qytetarët e Kosovës. Do ta marr vetëm një shembullm integrimi i Policisë së Kosovës dhe sistemit të drejtësisë në Veri në sistemin e Kosovës, si dhe anëtarësimin dhe pjesëmarrjen në organizata dhe iniciativa regjionale dhe ndërkombëtare”, tha ai.

Sipas Borrell, ky është një momentum i ri për dialogun, andaj duhet të shfrytëzohet.


“Unë dhe Bashkimi Evropian kemi investuar që të shohim progres të shpejtë që më në fund t’i lamë pas të këqijat dhe të arrijmë një marrëveshje ligjore për normalizimin e raporteve mes Kosovës dhe Serbisë dhe ta bëjmë realitet të ardhmen evropiane. Ky është një momentum i ri për dialogun, andaj duhet ta shfrytëzojmë atë. Është një momentum i ri për tërë rajoninm andaj duhet të shohim të gjitha mundësitë, jo vetëm për Kosovën dhe Serbinë, por për të gjithë rajonin, sepse marrëdhëniet mes këtyre dy vendeve janë shumë të rëndësishme për stabilitetin e tërë rajonit, për stabilitet afatgjatë, për progres ekonomik. Do të vazhdojmë dialogun me presidentin Vuçiq dhe kryeministrin Kurti, të cilët do t’i pres në Bruksel, andaj shpresoj shumë se do të kemi një takim efektiv”, tha Borrell në konferencën për media këtë të martë.

Gjatë ditës së djeshme, KosovaPress ka raportuar për agjenden e takimeve të sotme në Bruksel.

Borrell, në orën 10:30, do të ketë takime bilaterale, te ndara, fillimisht me kryeministrin e Kosovës, Albin Kurti, e pastaj edhe me presidentin e Serbisë, Aleksandër Vuçiq.

Ndërsa, një tryezë e përbashkët plenare është planifikuar për orën 11:00.

Në orën 12:30 është paralajmëruar një konferencë për media e përfaqësuesit Special të BE-së për dialogun Prishtinë – Beograd dhe çështje tjera të Ballkanit Perëndimor, Miroslav Lajçak.

Lexo edhe

Video

4 Comments

Komentet janë të mbyllura.