Blinken: Përshkallëzimi i situatës në veri i pengon përpjekjet euroatlantike
Lajme
Lexohet për: 2 min.
10 muaj më parë
Linku u kopjua
Sekretari amerikan i Shtetit, Antony Blinken, edhe njëherë u ka bërë thirrje Kosovës dhe Serbisë që të ndërmarrin hapa të menjëhershëm për uljen e tensioneve në veri. Sipas tij, përshkallëzimi i situatës i pengon përpjekjet në proceset integruese për dy vendet.
Diplomati amerikan ka folur pas takimit të ministrave të jashtëm të NATO-s, në Oslo të Norvegjisë.
“Ne i bëjmë thirrje qeverisë së Kosovës dhe asaj së Serbisë që të ndërmarrin hapa të menjëhershëm për të de-përshkallëzuar tensionet dhe të ripërtërijnë përpjekjet për zbatimin e marrëveshjeve të normalizimit të udhëhequra nga BE-ja. Ne mbështesim procesin e integrimit euroatlantik për Kosovën dhe Serbinë, por përshkallëzimi aktual më shumë i pengon sesa i ndihmon përpjekjet për të ecur në atë drejtim”, ka thënë Blinken.
Protestuesit serb në veri po kundërshtojnë hyrjen e kryetarëve shqiptarë në ndërtesat komunale.
Situata në këto komuna është tensionuar të premten e 26 majit kur kryetarët e betuar u detyruan të futën në zyrat e tyre të punës nën asistencën e Policisë së Kosovës.
Pesë policë kanë mbetur të lënduar në ditën e parë të protestave ndërsa të mërkurën institucioni i sigurisë ka bërë të ditur edhe për një zyrtar tjetër policor që ka marrë lëndime nga sulmet e protestuesve në veri të vendit.
Të mërkurën është bërë e ditur se NATO ka dislokuar 700 forca shtesë në Kosovë, si përgjigje ndaj trazirave të fundit në veri të Kosovës, ku protestuesit lanë të lënduar 30 ushtarë të KFOR-it.
NATO ka bërë të ditur se ka marrë vendim për angazhim të Forcës Operacionale Rezervë për Ballkanin Perëndimor, e cila ka qenë në gjendje gatishmërie për angazhim.
