Bizneset kërkojnë anulimin e menjëhershëm të vendimit nga kryetari Ahmeti

Bizneset kërkojnë anulimin e menjëhershëm të vendimit nga kryetari Ahmeti

Diskutimi lidhur me vendimin e Komunës së Prishtinës, me ç’rast televizionet dhe radiot detyrohen nga ky vit pandemik të paguajnë shtesë taksën komunale prej 1000 euro në vit, taksë kjo e cila u cilësua shumë e lartë për këto biznese, ishte qëllimi kryesor i takimit të zhvilluar në mes të përfaqësuesve të OAK-ut me sektorin medial.

Përgjatë këtij takimi u bashkëbisedua lidhur me sfidat me të cilat sektori medial po përballet aktualisht, me ç’rast u theksua që ngarkesa me një taksë të tillë të re është e papranueshme, sidomos kur industria mediale paguajnë disa lloje të taksave.

Kjo ngarkesë u cilësua si një barrë shumë e madhe, sidomos krahas vështirësive të krijuara si pasojë e pandemisë, ku ky sektor si i tillë është në gjendje shumë të rëndë.

Fazli Veliu, kryetar i Institutit të Medias së Kosovës, theksoi që si institut kanë kërkuar që ky vendim të anulohet meqenëse taksa që parashihet të paguhet është shumë e lartë dhe e papërballueshme për shumë media lokale dhe nacionale.

Ai tha se industria mediale aktualisht është në gjendje të rëndë, e si të tilla nuk gëzojnë përkrahje, andaj duhet të punojmë së bashku në kundërshtimin e kësaj takse dhe të lobohet që e njëjta të suspendohet.

Zamir Qeriqi nga TV Dielli theksoi që tashmë kanë pranuar faturën pa asnjë arsyetim se pse është marrë ky vendim. Ai potencoi gjithashtu rëndësinë që nëse vendoset një taksë duhet të bëhet kategorizimi, e jo e njëjta të vlejë si për mediat e vogla si për ato më të mëdha, andaj, rivlerësimi i këtij vendimi është i domosdoshëm.


Ndërsa, Ekrem Çitaku nga Radio Vala Rinore kërkoi që kjo taksë të largohet e të mos ngarkohen mediumet në periudhë pandemie edhe më tepër.

Arbana Gashi nga Radio Kosova e Lirë theksoi që ky vendim është marrë pa asnjë paralajmërim paraprak. Andaj, e njëjta kërkoi që të suspendohet për periudhën 3-5 vjet, me qëllim të diskutimit paraprak, kategorizimit dhe zvogëlimit të tarifës aktuale të vendosur.

Përparim Namani përfaqësues nga Radio Plus tha që krahasuar me taksat e tjera që sektori medial paguajnë, kjo i bie të jetë më e larta, duke tejkaluar kështu edhe atë të licencës që paguajnë në KPM.

Leart Hoxha nga ATV potencoi që vendimi në një shabllon si i tillë është i gabueshëm, andaj duhet të jepen sqarime për mënyrën se si kanë arritur deri tek kjo shifër.

Hoxha e cilësoi të domosdoshme që Komuna të nis një raund të ri të negociatave, në mënyrë që të merren disa parametra tjerë më normal qoftë sipas qarkullimit apo numrit të të punësuarve. Meqenëse Komuna e Prishtinës nuk ofron asgjë për mediat, as prona, as parking e as hapësira për pajisje, andaj për çfarë arsye po taksohen bizneset në këtë rast dhe të jepen sqarime se ku do të destinohen këto para.

Palët u dakorduan që të kërkohet suspendimi i këtij vendimi, pastaj të krijohet një grup punues që do të analizojë këto tarifa dhe të bëhet kategorizimi i tyre në bazë të fitimit të deklaruar, të ndalohet dërgimi i faturave te mediat, si dhe të ofrohet shërbim për bizneset që detyrohen të paguajnë këtë taksë në të ardhmen. 

Lexo edhe

Video