Kryeshefi i ngrohtores së kryeqytetit “Termokos”, Fisnik Osmani thotë se furnizimi me ngrohje varet nga operimi i Termocentralit Kosova B, i cili pas shpërthimit në Ibër Lepenc, pati pengesa. Ai potencoi se aktualisht ka furnizim stabil dhe se nuk ka telashe.

Osmani për KosovaPress, thekson se nëse paraqiten probleme në Kosova B, rrjedhimisht do të rrezikohet edhe shërbimi me mungesë të ngrohjes në Prishtinë.

“Lajmi i mirë është që është rregulluar atje, është sanuar përkohësisht dhe nuk pritet të ketë ndonjë afet të ngrohej në Prishtinë. Por, e natyrshme është ne varemi komplet prej operimit normal të Kosovës B, të dy turbinave B1 dhe B2. Për sa kohë që nuk ka problem atje, atëherë nuk rrezikohet as shërbimi jonë. Informatat e fundit momentalisht ka furnizim stabil dhe nuk ka diçka telashe…Nuk është paraqitur problem, kemi qenë në kontakt. Gjithçka është në kontroll. Nëse paraqiten probleme në Kosovën B natyrisht që do afektohet edhe mungesa e ngrohjes”, thotë Osmani.

Lidhur me këtë ka shkruar edhe ministrja e Ekonomisë, Artan Rizvanolli, për çka tha se është siguruar furnizimi i rregullt me energji elektrike për vendin dhe ngrohje qendrore për qytetarët e Prishtinës.

Gjatë mbrëmjes të së premtes në veri të Kosovës, një shpërthim dëmtoi një kanal të ujit që furnizon dy termocentrale me qymyr, përgjegjëse për prodhimin e pjesës më të madhe të energjisë elektrike të vendit.

Autoritetet në Kosovë thanë se për shkatërrimin e kanalit të ujit në Ibër Lepec janë përdorur 15 kilogramë eksploziv.

Lidhur me këtë, pati reagime nga institucionet vendore dhe ato ndërkombëtare të cilat e dënuan këtë sulm.

Në një konferencë urgjente, kryeministri i Kosovës, Albin Kurti tha se ky sulm është terrorist dhe i organizuar nga bandat kriminale të mbështetura nga Beogradi zyrtar.