Me qëllim të shtimit të sigurisë publike dhe parandalimit të incidenteve të ndryshme, Policia e Kosovës ka shtuar masat e sigurisë përfshirë veriun e vendit ku ditëve të fundit kanë ndodhur disa sulme/incidente serioze kriminale.

Në njoftim thuhet se do të ketë shtim të aktiviteteve policore për të ofruar më shumë siguri në tërë vendin, për të gjithë qytetarët pa dallim dhe se planifikimet operative policore do të fokusohen në rritjen e prezencës policore në terren, duke realizuar më shumë patrullime në zona më kritike, më shumë pika kontrolli dhe rritje të bashkëpunimit me qytetarët.

Policia synon ruajtjen e rendit dhe qetësisë publike, të parandalojë aktet kriminale dhe të hetojë dhe vë para drejtësisë të gjitha ata që atakojnë sigurinë, ligjin dhe rendin kushtetues.

Qëllimi i operacioneve policore do të jetë siguria e qytetarëve, siguria e pronës së tyre e pronës publike dhe asaj institucionale.

Policia njëherësh u bën thirrje qytetarëve që edhe tani e tutje të ndajnë informacione me qëllim të rritjes së sigurisë për të gjithë pa dallim.