Kërkesat e presidentit serb, Aleksandër Vuçiq ndaj Kosovës s’kanë asnjë rëndësi për vendin, ka thënë presidentja e Kosovës, Vjosa Osmani.

E para e vendit akuzoi Vuçiq se po punon në prapaskenë për destabilizim të rajonit dhe rikthim në vitet e 90-ta. Sipas saj, në asnjë moment president serb nuk është i interesuar që serbët të kthehen në institucionet e Kosovës.

Megjithatë, Osmani tha se institucionet e Kosovës duhet të punojnë në lidhje që të gjithë qytetarët e nacionalitetit serb në Kosovë në përputhje me procedurat e ligjshme të jenë në të gjitha institucionet e Kosovës.

Në lidhje me dialogut me Serbinë, presidentja Osmani tha se i njëjti nuk po zhvillohet në përputhje me parimin e barazisë.

Ajo nënvizoi se hapja e urës së Ibrit nuk duhet të bëhet temë në dialogun e Brukselit, pasi kjo do të ishte cenim i sovranitetit dhe kushtetutshmërisë.

Krahas kësaj, Osmani tha se Kosova s’ka frikë nga asnjë kërcënim i Vuçiqit, pasi institucionet e sigurisë janë të gatshme të mbrojnë sovranitetin në çdo cep të vendit.

Këto komente, presidentja Osmani i tha para mediave pas lansimit të  Qendrës Rajonale të Ekselencës për Gratë, Paqen dhe Sigurinë.