Pas një fillimi të shkëlqyer të jetës në Inter, Mehdi Taremi ka pësuar një dëmtim muskulor dhe pritet të mungojë në fillimin e sezonit 2024-25 në Serie A. Sulmuesi 32-vjeçar iranian nënshkroi zyrtarisht për ‘Nerazzurrët’ muajin e kaluar pasi u largua nga Porto si transferim i lirë dhe ai është i impenjuar menjëherë në përgatitjet e tyre parasezonale, duke shënuar pesë gola në tri ndeshje miqësore.

Duke nënshkruar një kontratë trevjeçare, Taremi pritet të luajë një rol si rezervist për sulmuesit kryesor të Interit, Lautaro Martinez dhe Marcus Thuram, përcjellë KosovaPress.

Interi konfirmoi se Taremi pësoi një tendosje muskulore në kofshën e majtë, një dëmtim që do ta mbajë jashtë fushës për rreth 10-15 ditë. Ndeshja e parë e klubit në sezonin e ri të Serisë A fillon kundër Genoas më 17 gusht dhe ai tani pritet të mungojë në  këtë ndeshje.

Shpresa është që sulmuesi 32-vjeçar të jetë mjaftueshëm në formë për të marrë pjesë në ndeshjen e dytë të sezonit kundër Lecce-s më 24 gusht .