Shefi i Grupit Parlamentar të PDK-së, Abelard Tahiri, ka paralajmëruar se do të dërgojnë në Prokurorinë Speciale emërimet e reja në krye të Komisionit hetimor për tekstet shkollore, pas zëvendësimeve të kryetarit dhe zëvendës-kryetarit të këtij komisioni nga radhët e opozitës.

Ai në një postim në Facebook ka thënë se në panikun e gjetjeve të deritanishme në Komisionin hetimor parlamentar për hetimin e “aferës së keqpërdorimit të miliona eurove në emër të subvencionimit të blerjes së teksteve shkollore”, deputetët e shumicës, anëtarë të këtij komisioni kanë vendosur që ta minojnë dhe bllokojnë hetimin përfundimtar të kësaj afere, duke u mbledhur sot në mënyrë të paligjshme, duke zëvendësuar kryetarin dhe zëvendës-kryetarin e këtij komisioni nga radhët e opozitës, të cilët i ka zgjedhur Kuvendi.

“Si grup parlamentar iniciues të këtij Komisioni Hetimor, vendimin e sotëm të deputetëve të shumicës parlamentare e konsiderojmë jo vetëm të paligjshëm, por atak të drejtpërdrejtë mbi mandatin e deputetit si përfaqësues i popullit, vendim i cili, në të njëjtën kohë është edhe një provë shtesë se pse pushteti i frikësohet hetimit të kësaj afere dhe pse ka vendosur që në mes të procesit ta bllokojnë këtë komision”, ka thënë Tahiri.

Ai ka theksuar se në bazë të nenit 10 të ligjit në fuqi për Hetimin Parlamentar, kryetari dhe zëvendës-kryetari i Komisionit hetimor i takon opozitës, andaj edhe Kuvendi në seancë plenare ka vendosur për përbërjen e tij me rastin e themelimit të Komisionit.

“Për këtë vendim të paligjshëm e të turpshëm, do të kërkojmë sqarime edhe nga kryetari i Kuvendit, para se t’i drejtohemi Prokurorisë Speciale për të hetuar këtë aferë korruptive, që ka për kryeprotagoniste ministren e Arsimit Arbërie Nagavci”, ka përfunduar Tahiri.

Ndryshe, pavarësisht mungesës së kryesuesit dhe zëvendëskryesuesit, Komisioni hetimor për tekstet shkollore ka zhvilluar sot mbledhje, por që e njëjta u konsiderua jo ligjore dhe në kundërshtim me rregulloren e Kuvendit. Megjithëkëtë, komisioni i përbërë nga deputetë të mazhorancës intervistuan tre ish-ministra të Arsimit, ndërsa ish-ministrja Hykmete Bajrami refuzoi të përgjigjet pasi tha se nuk merr pjesë në shkeljen ligjore të deputetëve të pushtetit.