Kryeparlamentari Glauk Konjufca, në gjashtëvjetorin e vdekjes së simbolit të rezistencës kombëtare, Adem Demaçi, bëri homazhe dhe vendosi lule pranë varrit të tij në Prishtinë.

Duke kujtuar me pietet figurën poliedrike të Adem Demaçit, i pari i Kuvendit tha se veprimtaria politike dhe intelektuale e tij është e shtrirë në më shumë se gjashtë dekada.

Konjufca tha se Demaçi në burg ishte i pathyeshëm, duke bërë qëndresë të madhe dhe duke frymëzuar breza të tërë që të vazhdohet lufta për liri dhe për të mos iu nënshtruar pushtuesit serb.

“Jo vetëm që ka dhënë shembullin e guximit me veprimtarinë e vet të drejtpërdrejtë, por ka dhënë një orientim shumë të rëndësishëm për popullin tonë. Në të njëjtën kohë ka shkruar edhe shumë libra, duke qenë një shkrimtar i jashtëzakonshëm. Veprimtaria e tij politike na frymëzon edhe neve që jemi përgjegjës të institucioneve publike, por gjithashtu edhe vepra e tij si shkrimtar duhet të studiohet më shumë”, tha ai.

Konjufca shtoi se Demaçi edhe pas shpalljes së pavarësisë së Kosovës ishte i pandalshëm.

“Sidomos gjenerata e re e politikanëve, të cilës i përkas edhe unë, ka qenë shumë e frymëzuar nga baca Adem dhe veprimtaria e tij. Për këtë arsye ne do ta nderojmë dhe do ta kujtojmë gjithmonë dhe vepra e tij do të jetojë gjatë”, tha ai.

Ndryshe, sot bëhen gjashtë vjet që kur ndërroi jetë veprimtari i çështjes kombëtare, Adem Demaçi, i njohur si Mandela i Kosovës. Për angazhimin e tij politik, Adem Demaçi vuajti 28 vjet me radhë në burgjet e Jugosllavisë. Pasi u lirua ai menjëherë vazhdoi aktivitetin e tij politik. Ai u quajt edhe Nelson Mandela i Evropës.

Demaçi udhëhoqi Këshillin për të Drejtat dhe Liritë e Njeriut (KMDLNJ) nga viti 1990 deri në vitin 1995. Në vitin 1991 u nderua nga Parlamenti Evropian me Çmimin Saharov. Gjatë periudhës 1998-1999, kur mbaheshin takimet në Rambouillet për të ardhmen e Kosovës, ai ishte zëdhënës politik i UÇK-së. Ishte njëkohësisht kryetar i Lidhjes së Shkrimtarëve të Kosovës (2005-2007).

• 

•