Ish-portieri i Manchester United, David de Gea, është i hapur rreth idesë për t'u bashkuar me Genoan si një lojtar i lirë, bën të ditur Gianluca Di Marzio.

Portieri 33-vjeçar spanjoll ka qenë pa skuadër që kur u largua nga Manchester United në korrik të vitit të kaluar, duke kaluar një sezon të tërë futbolli jashtë fushës. Ai u zëvendësua nga ish-portieri i Interit, Andre Onana në formacionin titullar, raporton KosovaPress.

Genoa është në kërkim të një portieri të ri pasi ka shitur Josep Martinez te Interi dhe po i mban të hapura opsionet, duke dashur të sigurojë që trajneri Alberto Gilardino të ketë përforcimet e duhura për sezonin e tij të dytë në Serie A në krye të klubit.

Di Marzio detajon se si De Gea është i hapur rreth idesë për të nënshkruar me Genoan, duke besuar në projektin e tyre, dhe klubi tani duhet të vendosë nëse do të transferojë ish-portierin e Manchester United apo jo.

Portieri spanjoll kaloi 12 vjet me “Djajtë e Kuq” nga viti 2011 deri në 2023, duke bërë 545 paraqitje në të gjitha garat, duke mbajtur 190 herë portën e paprekur.