Regjimet ushtarake në pushtet në Burkina Faso, Mali dhe Nigeri ratifikuan aleancën e tyre brenda kornizës së një "konfederate" në samitin e tyre të parë në kryeqytetin Niger, Niamey, një vendim që shënon ndarjen e tyre me pjesën tjetër të bllokut të Afrikës Perëndimore.

Krerët e shteteve të tre vendeve (ushtarakët që erdhën në pushtet me grusht- shtet) "vendosën të hedhin një hap tjetër drejt integrimit më të ngushtë. Për këtë qëllim, ata miratuan traktatin për krijimin e një konfederate midis të dyve të quajtur Konfederata e Shteteve të Sahelit”, thuhet në komunikatë.

Në janar, të tri shtetet njoftuan se po largoheshin nga Komuniteti Ekonomik i Shteteve të Afrikës Perëndimore (ECOWAS), pasi sipas tyre, kjo organizatë përdoret si mjet nga Franca, ish-fuqi koloniale, për t’u shkëputur me të cilën kanë bërë shumë hapa. Krijimi i një konfederate konfirmon këtë shkëputje.

"Populli ynë i ka kthyer shpinën në mënyrë të pakthyeshme ECOWAS," tha gjenerali Abdurahaman Chiani, kreu i regjimit ushtarak të Nigerit, në hapjen e samitit ku morën pjesë edhe lideri i Burkina Faso - kapiten Ibrahim Traore dhe lideri i Malit - kolonel Assimi Goita.

Gjermania tërhiqet nga baza kryesore ajrore në Niger • KosovaPress

Të tre, të veshur me uniforma ushtarake, mbërritën në qendrën e konferencave të Niamey në mesditë për takimin, i cili u zhvillua nën masa të rrepta sigurie.

Chiani i bëri thirrje aleancës së mbrojtjes tre-vendeve të Sahelit (ADA) që të bëhet "një alternativë për çdo aleancë artificiale rajonale duke ndërtuar një komunitet sovran popujsh, një komunitet që qëndron larg kontrollit të fuqive të huaja".

Marrëdhëniet midis tri shteteve dhe ECOWAS u përkeqësuan ndjeshëm pas grushtit të shtetit më 26 korrik 2023, i cili solli në pushtet gjeneralin Chiani.

Në atë kohë, ECOWAS vendosi sanksione të rënda ekonomike ndaj Nigerit dhe kërcënoi se do të ndërhynte ushtarakisht për të rikthyer presidentin e rrëzuar Mohammed Bazoum në postin e tij.

Në shkurt, sanksionet u hoqën, por marrëdhëniet midis dy kampeve mbeten të akullta.

Një takim i krerëve të shteteve të vendeve të ECOWAS është planifikuar për nesër në kryeqytetin e Nigerisë, Abuja, në agjendën e të cilit është çështja e marrëdhënieve me ADA.

Në mars, vendet e ADA formuan një forcë të përbashkët për të luftuar xhihadistët që sulmojnë rregullisht territoret e tyre.

Sot, ata shprehën gjithashtu dëshirën për të "bashkuar burimet e tyre" në sektorë të konsideruar strategjikë, si bujqësia, uji, energjia dhe transporti. Përveç kësaj, udhëheqësit thanë se dëshironin që gjuhët lokale të përdoreshin më shumë në mediat publike dhe private në vendet e tyre. /BTA