Ushtria amerikane do të dërgojë dhjetëra avionë luftarakë më të fundit në Japoni për një modernizim prej 10 miliardë dollarësh të trupave të saj në vendin aziatik, njoftoi Departamenti Amerikan i Mbrojtjes.

Në një deklaratë për shtyp, Pentagoni vuri në dukje se modernizimi do të kryhet gjatë viteve të ardhshme për të forcuar aleancën SHBA-Japoni dhe për të forcuar paqen dhe stabilitetin në rajonin Indo-Paqësor, shkruan CNN.

Plani i modernizimit përfshin dorëzimin e 48 avionëve luftarakë të gjeneratës së pestë F-35A në vend të 36 F-16 në bazën ajrore Misawa në veri të Japonisë dhe vendosjen e 36 avionëve të rinj F-15EX në bazën ajrore Kadena në ishullin Okinawa, duke zëvendësuar 48 modele më të vjetra F-15C/D.

Në bazën ajrore të Trupave Detare Iwakuni, në jug të Hiroshimës në ishullin kryesor Honshu, numri i F-35B-ve të vendosur do të përshtatet me situatën, tha Pentagoni, pa dhënë numra specifikë.

“Plani i ministrisë për të stacionuar avionin taktik më të avancuar në Japoni tregon përkushtimin e palëkundur të Amerikës për mbrojtjen e Japonisë dhe vizionin e përbashkët për një rajon të lirë dhe të hapur Indo-Paqësor”, thuhet në njoftim.

Japonia ka thënë se vendosja e avionëve të rinj luftarakë në vend do të rrisë aftësitë e SHBA-së.

Aleanca midis Japonisë dhe SHBA-së po bëhet gjithnjë e më e rëndësishme në një rajon ku Kina, Rusia dhe Koreja e Veriut përfaqësojnë kërcënime që Tokio dhe SHBA po përpiqen t'i shtypin, andaj dërgimi i një force të konsiderueshme ajrore në Japoni është një mesazh i qartë jo vetëm për Kinën, por edhe për Rusinë.

Japonia ka mosmarrëveshje të pazgjidhura territoriale në veri me Rusinë dhe Kinën për ishujt në Detin e Kinës Lindore. Në të njëjtën kohë, programi gjithnjë e më i fuqishëm raketor të Koresë së Veriut, i cili vitet e fundit ka rezultuar në lëshimin e raketave mbi territorin japonez, tërheq dënimin nga Tokio pas çdo prove.

Japonia monitoron gjithashtu nga afër situatën rreth Tajvanit, të cilin Kina ka premtuar se do ta merr nën kontroll nëse është e nevojshme me forcë.

Gati 90% e furnizimeve me energji të Japonisë vijnë nëpërmjet rrugëve detare pranë Tajvanit, kështu që Tokio e konsideron situatën aktuale rreth ishullit vendimtare për sigurinë e tij. Okinawa është vetëm rreth 725 kilometra nga Tajvani, dhe SHBA dhe Japonia mbajnë baza ushtarake në ishull.

F-35A do të vendoset në bazën ajrore Misawa. Këta janë avionët më të fundit luftarakë stealth. Ata konsiderohen si një zëvendësim për F-16 në arsenalin e aviacionit të ushtrisë amerikane.

SHBA dhe Japonia njoftuan vitin e kaluar se një njësi e re detare me aftësi të avancuara të inteligjencës dhe mbikëqyrjes dhe aftësinë për të gjuajtur raketa kundër anijeve do të vendoset në Japoni.