Ministri i Jashtëm i Ukrainës Dmytro Kuleba ka mirëpritur vendimin e rëndësishëm të Rumanisë për transferimin e sistemit të mbrojtjes ajrore Patriot në Ukrainë.

Ai ka thënë se ky hap do të ndihmojë në mbrojtjen e qiejve të Ukrainës, civilëve dhe infrastrukturës kritike nga sulmet e vazhdueshme të Rusisë.

“Do të forcojë gjithashtu sigurinë e të gjithë rajonit tonë. Sa herë që rrëzojmë një raketë ruse që fluturon drejt perëndimit në Ukrainë, ne gjithashtu heqim një kërcënim të mundshëm për fqinjët tanë evropianë”, ka thënë Kuleba në një postim në X.

Kuleba u ka bërë thirrje shteteve të tjera që të ndjekin hapin e Rumanisë dhe të ofrojnë sisteme shtesë të mbrojtjes ajrore Patriot, si dhe një furnizim të qëndrueshëm të interceptorëve, në mënyrë që “bashkërisht ta mposhtin terrorin ajror rus”.