Sfidat dhe nevojat për më shumë transparencë në sistemin e drejtësisë
Lajme
Lexohet për: 2 min.
4 javë më parë
Linku u kopjua

Rreth 30 zyrtarë për informim nga sistemi prokurorial e gjyqësor në Kosovë u trajnuan për transparencë në drejtësi. Për dy ditë radhazi ata ishin pjesë e punëtorisë “Forcimi i transparencës në sistemin e drejtësisë në Kosovë”, të organizuar nga Qendra për Inovacione dhe Zhvillim (CFID). Qëllimi i kësaj punëtorie ka qenë përmirësimi dhe rritja e transparencës në sistemin e drejtësisë në raport me mediat dhe publikun. Pjesëmarrësit kanë qenë zyrtarë për informim nga Këshilli Prokurorial i Kosovës, të të gjitha prokurorive themelore, si dhe Këshillit Gjyqësor të Kosovës dhe gjykatave në vend.

Publikimi i lajmeve të pakonfirmuara po shkakton dëm të madh te viktimat dhe në vet procesin e hetimeve, u tha në këtë punëtori të mbajtur në tri sesione të ndara.

Udhëheqësja e zyrës për informim në Gjykatën Supreme, Antigona Uka-Lutfiu konsideroi se publikimi i lajmeve pa konfirmimin e zëdhënësve të gjykatave është gabimi themelor.

Në punëtorinë dy-ditore u theksua edhe nevoja për numër më të madh të stafit në fushën e komunikimit.

Sfidat në realizimin e niveleve të komunikimit u përmendën edhe nga përgjegjësi për komunikim publik në Këshillin Prokurorial të Kosovës, Bedri Gashi.

Menaxheri i projektit, Fadil Miftari tha se kjo punëtori ka synuar përmirësimin dhe rritjen e transparencës së sistemit të drejtësisë në raport me mediat dhe publikun.

Në sesionet e kësaj punëtorie, Fadil Miftari shtoi se kanë qëllim të diskutohet nëse këto dy mekanizma të drejtësisë janë të gatshme të qasen me publikun në epokën digjitale.

Punëtoria e mbajtur në Durrës u organizua nga Qendra për Inovacione dhe Zhvillim (CFID) në bashkëpunim me Institutin e Kosovës për Drejtësi (IKD) dhe u financua nga Misioni i Kombeve të Bashkuara në Kosovë UNMIK.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024