Inspektorati Policor i Kosovës, përkatësisht Departamenti i Hetimeve përmes Linjës së Kaltër, numrit të telefonit pa pagesë 080003333, ka pranuar sot një informacion nga Policia e Kosovës lidhur me dyshimet se një toger policor ka kryer veprën penale fotografimi dhe incizimet tjera të paautorizuara.
Hetuesit e IPK-së kanë dalë në vendin e ngjarjes ku dyshohet se është kryer vepra penale, respektivisht në zyrat e Sindikatës së Policisë së Kosovës dhe kanë kontaktuar prokurorin kompetent, duke ndërmarrë veprime konkrete hetimore së bashku me njësi relevante të Policisë së Kosovës.
IPK pas veprimeve fillestare hetimore ka rekomanduar suspendimin e zyrtarit të dyshuar. Inspektorati Policor i Kosovës mbetet i përkushtuar në përmbushje të misionit ligjor në konsultim të vazhdueshëm edhe me prokurorin përgjegjës për zbardhjen e plotë të rrethanave të këtij rasti.
