Presidenti i Francës Emmanuel Macron ka thënë se parandalimi i fitores së Rusisë në luftë është një qëllim strategjik i sigurisë, dhe në rrethana të caktuara, ai nuk përjashton dërgimin e trupave tokësore evropiane në Ukrainë. Lideri francez e tha këtë në një intervistë për The Economist, transmeton Ukrinform. "Nëse rusët do depërtonin vijën e parë të frontit, nëse do të kishte një kërkesë nga Ukraina - gjë që nuk është rasti sot - ne do t'i bënim vetes në mënyrë legjitime pyetjen. Prandaj, mendoj se ta përjashtosh këtë apriori do të thotë të mos mësosh mësimet e dy viteve të fundit”, tha Macron. “Sepse nëse Rusia vendos të shkojë më tej, ne të gjithë do të duhet t’ia bëjmë këtë pyetje vetes”, shtoi ai.
Lidhur me aftësitë e Francës, presidenti vuri në dukje se disa mijëra trupa franceze janë vendosur së fundmi në Sahel për të luftuar terrorizmin dhe kjo është bërë "me kërkesë të shteteve sovrane". Sipas Macron, çdo zhvillim nuk mund të përjashtohet, sepse “ne përballemi me dikë që nuk përjashton asgjë [nënkupton Vladimir Putinin]”. "Ne kemi qenë padyshim shumë të pavendosur në formulimin e kufijve të veprimeve tona përballë dikujt që nuk i ka më dhe që është agresori. Në samitin e NATO-s në verën e vitit 2022, ne të gjithë përjashtuam furnizimin me tanke, raketa me rreze të gjatë dhe avionë. Tani jemi të gjithë në proces (të këtyre dërgesave), kështu që do të ishte gabim të përjashtonim pjesën tjetër. Por mbi të gjitha do të ishte e gabuar për sa i përket besimit dhe frenimit të rusëve”, tha Macron.
