DASH: Problemet me pavarësi të gjyqësorit dhe kufizimet në liri të mediave, ndër shqetësimet kryesore për Kosovën
Lajme
Lexohet për: 3 min.
1 muaj më parë
Linku u kopjua

Problemet serioze në pavarësinë e gjyqësorit, kufizime serioze në lirinë e shprehjes dhe të mediave, përfshirë kërcënime apo dhunë kundër gazetarëve, dhe dhuna me bazë gjinore, janë përmendur vetëm disa prej problemeve me të cilat vazhdon të përballet Kosova, sipas raportit të Departamentit amerikan të Shtetit për vitin 2023, sa u përket të drejtave të njeriut në botë.

Në raport është përmendur se më 2023 nuk është raportuar për ndonjë ndryshim të madh sa i përket situatës me të drejta të njeriut në Kosovë.

Në raportet e kaluara është përmendur edhe korrupsioni qeveritar dhe kërcënimi për dhunë që shënjestron minoritete etnike dhe komunitetet e margjinalizuara.

“Qeveria ka marrë hapa kredibilë por jokonsistentë për të identifikuar, hetuar, gjykuar dhe ndëshkuar zyrtarët që mund të kenë kryer abuzime me të drejtat e njeriut”, është thënë në raport.

Në raportin e Departamentit amerikan të Shtetit është thënë se SHBA-ja është zotuar për të rritur investimet në gjithë botën në fushën e demokracisë dhe të drejtave të njeriut.

Sekretari amerikan i Shtetit, Antony Blinken, ka thënë se shpreson që vlerësimet e bëra për abuzimet e të drejtave të njeriut në botë, u japin edhe më shumë forcë individëve të guximshëm në gjithë globin, të cilët rrezikojnë jetën e tyre për të përmirësuar kushtet në shtetet e tyre, dhe për ta bërë botën vend më të sigurt për të gjithë.

Në mesin e problemeve kryesore në botë në fushën e të drejtave të njeriut është përmendur ndikimi i luftës së Rusisë në Ukrainë.

Në raport është thënë se në disa raste, shkeljet e të drejtave të njeriut që kryhen prej Rusisë në Ukrainë përbëjnë krime kundër njerëzimit.

Është përmendur edhe lufta mes Izraelit dhe Hamasit, grupit palestinez të shpallur terrorist prej Shteteve të Bashkuara dhe Bashkimit Evropian, që ka nisur më 7 tetor të vitit të kaluar.

Lufta është nxitur prej sulmeve të Hamasit në tokën izraelite duke vrarë mbi 1.200 njerëz dhe duke marrë peng 240 të tjerë.

“Teksa Izraeli e shfrytëzon të drejtën për vetëmbrojtje, ne kemi bërë të qartë që ai duhet të kryejë operacione ushtarake në përputhje me ligjin ndërkimbëtar dhe të marrë masa për mbrojtjen e civilëve” është thënë në raport.

Pas sulmit të Hamasit, Izraeli ka nisur ofensivë ushtarake tokësore dhe ajrore në Gazë, me qëllim të shkatërrimit të grupit.

Sipas autoriteteve shëndetësore palestineze, si pasojë e ofensivës izraelite janë vrarë rreth 33.000 palestinezë.

Në raport janë përmendur edhe abuzimet serioze me të drejtat e njeriut në Iran, më pas keqtrajtimet e afganëve nga regjimi i talibanëve në Afganistan, keqtrajtimet e ujgurëve myslimanë në Ksinjiang të Kinës, si dhe ato në Kubë./REL/

A do te jetë qeveria e ardhshme VV-PDK?
Po
Jo
Nuk e di
Voto
377
Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024