Biden kërkon ndalimin e automjeteve elektrike të prodhuara në Kinë
Biznes
Lexohet për: 4 min.
1 muaj më parë
Linku u kopjua

Presidentit Joe Biden i është kërkuar të ndalojë importet e makinave elektrike të prodhimit kinez në SHBA. Kryetari i Komitetit Bankar të Senatit, senatori Sherrod Brown, shkroi "Mjetet elektrike kineze janë një kërcënim ekzistencial për industrinë amerikane të automobilave". Komentet e tij janë më të fortat ende nga çdo ligjvënës amerikan për këtë çështje, ndërsa të tjerë kanë kërkuar tarifa të larta për të mbajtur automjetet elektrike kineze jashtë vendit. Në shkurt, Shtëpia e Bardhë tha se SHBA po hapte një hetim nëse makinat kineze paraqesin rrezik për sigurinë kombëtare. “Ne nuk mund ta lejojmë Kinën të sjellë mashtrimin e saj të mbështetur nga qeveria në industrinë amerikane të automobilave”, tha senatori Brown në një video në platformën e mediave sociale X. Senatori Brown, i cili është një demokrat nga shteti prodhues i makinave të Ohajos, po kërkon të fitojë një mandat të katërt në detyrë në zgjedhjet e nëntorit.

Në shkurt, presidenti Biden tha se politikat e Kinës "mund të vërshojnë tregun tonë me automjetet e saj, duke paraqitur rreziqe për sigurinë tonë kombëtare" dhe se ai "nuk do ta lejojë këtë të ndodhë në kohën time". Uashingtoni mund të vendosë kufizime lidhur me shqetësimet se teknologjia në makinat e prodhuara në Kinë mund të "mbledhë sasi të mëdha të dhënash të ndjeshme për drejtuesit dhe pasagjerët e tyre", tha Shtëpia e Bardhë. Ai paralajmëroi makinat që janë të lidhura me internetin "përdorin rregullisht kamerat dhe sensorët e tyre për të regjistruar informacione të detajuara mbi infrastrukturën amerikane; ndërveprojnë drejtpërdrejt me infrastrukturën kritike; dhe mund të pilotohen ose çaktivizohen nga distanca". Kina është prodhuesi më i madh në botë i makinave dhe konkurron me Japoninë për të qenë eksportuesi më i madh i automjeteve. Megjithatë, numri i makinave kineze në rrugët e SHBA-së është jashtëzakonisht i ulët për faktin se kjo e fundit vendos aktualisht një tarifë 27.5% për automjetet.

Këtë javë, ndërsa ishte në një udhëtim në Kinë, sekretarja e Thesarit e SHBA-së, Janet Yellen, paralajmëroi Pekinin se Uashingtoni nuk do të lejonte përsëritjen e "shokut kinez" të fillimit të viteve 2000, kur importet kineze vërshuan në Amerikë. Në përgjigje, zëvendësministri i Financave i Kinës, Liao Min, shprehu "shqetësim të madh" për kufizimet që SHBA ka vendosur në tregti dhe investime. Liao tha se avantazhet konkurruese të Kinës janë për shkak të "tregut të saj në shkallë të gjerë, sistemit të plotë industrial dhe burimeve të bollshme njerëzore". Gjithashtu të enjten, linjat ajrore më të mëdha të Amerikës i kërkuan administratës Biden të ndalojë miratimet e fluturimeve të reja midis SHBA-së dhe Kinës. Në një letër drejtuar sekretarit të Shtetit Antony Blinken dhe sekretarit të Departamentit të Transportit, Pete Buttigieg, ata thanë se "politikat e dëmshme antikonkurruese" të Kinës i vendosin transportuesit amerikanë në disavantazh.

Dy ekonomitë më të mëdha në botë janë bllokuar në një luftë tregtare që nga viti 2018, kur administrata e atëhershme Trump vendosi tarifa për më shumë se 360 miliardë dollarë të mallrave kineze. Pekini u hakmor me tarifa për më shumë se 110 miliardë dollarë produkte amerikane. Vitin e kaluar vlera e mallrave që SHBA bleu nga Kina ra me pak më shumë se 20% në 427 miliardë dollarë. Në të njëjtën kohë, eksportet e SHBA në Kinë ranë me 4% në pak më pak se 148 miliardë dollarë. /BBC

A duhet të ketë zgjedhje të parakohshme?
Po
Jo
Nuk e di
Voto
677
Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024