Korrektësia ndaj klientëve, kualiteti cilësor i materialit punues, përvoja mbi dy dekada dhe bashkëpunimi me kompani të fuqishme ndërkombëtare, e karakterizojnë ndërmarrjen “FMB Group”, në Malishevë me pronar Fadil Begaj.

Prodhimi sa më cilësor i dyerve, dritareve dhe produkteve të tjera të ngjashme me standarde evropiane, është “specialiteti” i kësaj kompanie.

Puna dhe përgjegjësia e tyre e bërë ndër vite, krijoi besimin tek mijëra njerëz për të qenë klientë të këtyre prodhimeve. Ndërkaq, suksesi i tyre nuk u ndal vetëm në Kosovë. Që nga viti 2008, kompania “FMB Group”, eksporton prodhimet e saj në Itali, Gjermani e që pret të arrijë edhe në Francë.

Biznesin e tyre e filluan që nga paralufta, ndërkaq viti 2001, vlerësohet të jetë fillimi i një kapaciteti më të madh, ku edhe u punësuan rreth 20 punëtorë.

Investimi i kësaj ndërmarrje u fokusua tek plastika, pas punimit të produkteve me alumin. Ndërkaq, pavarësisht sfidave që u shkaktoi pandemia Covid-19, kjo ndërmarrje me përkushtim e profesionalizëm arriti që të mbijetojë e të rikthehet fuqishëm në treg.

Pronari i kompanisë “FMB Group”, Fadil Begaj në një intervistë për KosovaPress, tha se përveç që janë të përkushtuar në plotësimin e kërkesave të klientëve, prioritet i kësaj kompanie është edhe krijimi i kushteve sa më të mira për punëtorët.

Ndërkaq, si vitin më të suksesshëm për këtë kompani përmend atë parapandemik 2018-2019.

Begaj tha se përveç në Itali e Gjermani, planifikojnë që artikujt e tyre t’i eksportojnë edhe në Francë.

"Biznesi ynë ka filluar edhe paraluftës si prodhimtari, por aktiviteti i plotë i kompanisë është pas luftës kur investimet i kemi bërë, dhe kur e kemi zgjedhuar kapacitetin. 2001-tën e njehim si fillim me kapacitet më të plotë. Atëherë kemi pasur rreth 20 punëtorë, atëherë njihet vetëm si fillimi i kapacitetit më të madh. Në fillim kemin punuar me alumin, dyer, dritare alumin, më pas menjëherë kemi investuar tek PVC-ja apo plastika...Prej cilit vit eksportoni prodhimet e juaja? Prej 2008-2010, gjithmonë e kemi pasur një ngritje të vogël solide...Viti më i suksesshëm ka qenë para pandemisë, viti 2018-2019, pastaj pandemia na ka kthyer mbrapa...Në cilat vende eksportoni? Kryesisht në Itali, pjesërisht edhe në Gjermani, tani jemi afër një kontrate për Francë. Po besojmë që aty do të jetë edhe më afatgjate, më mirë...Kryesisht janë dyer, dritare, pjesërisht janë edhe dyer e dritare bashkërisht me roleta, kemi kërkesa edhe tek terasat...Për momentin jemi 11 punëtorë...Si janë kushtet e punës së punëtorëve? Janë solide, edhe ne vet nuk jemi të kënaqur mjaftueshëm që punëtori mos të ndodhë sikur që është duke ndodhur, largimi i tyre prej vendit. Mundohemi me ua plotësu kushtet sa i kemi mundësitë dhe kapacitetin tonë", tha Begaj.

Begaj theksoi se janë ndër të parët në vend sa i përket kësaj veprimtarie, derisa tregoi se “FMB Group”, bashkëpunon më një kompani të fuqishme ndërkombëtare.

Ai tha se mundohen që të jenë gjithmonë sa më afër klientëve dhe t’iu përgjigjen kërkesave të tyre, në mënyrë që ata të ndahen të kënaqur.

Përveç këtyre, Begaj theksoi se kanë plane që zgjerojnë kapacitetet e këtij biznesi dhe të bëjnë investime të tjera.

Ai tha se bëjnë grumbullimin e mbetjeve të plastikës, duke synuar që t’i shndërrojnë ato në lëndë të parë për prodhues të tjerë që u duhen për produkte të tjera.

"Përpos kualitetit bashkëpunojmë edhe me një kompani të fuqishme ndërkombëtare që është 'VEKA AG'. Korrektësia ndaj klientëve, edhe prej të parëve në vend. Si pasluftë, ku kemi filluar thuajse të parët...Mundohemi t’iu qëndrojmë karshi (klientëve) për çdo problem që ata kanë, mos të  jemi larg tyre por të jemi afër, që ata të jenë të kënaqur. Cilat janë planet e juaja për ta zgjeruar kompaninë? Kemi plane, kemi bërë edhe një investim në kohë pandemie kur nuk e kemi ditë që veç vjen pandemia. Mbetjet e PVC-së, kur ne kemi këtu mbetje apo copa, për vete dhe grumbullim të tjerëve prodhuesve të tjerë, kemi synim t’i bëjmë si lëndë të parë të dikujt tjetër që i duhen për një produkt tjetër. Kemi ngecur tek problemi, ndryshimi i cmimeve, duhet edhe pak investim, zgjerim i kapaciteteve, lokali së pari, ta bëjmë si prodhimtari të dytë", potencoi Begaj për KosovaPress.

FMB Group nga përvoja shumë vjeçare në këtë fushë ka arritur që të specializojë çdo fazë të prodhimit të produkteve tona, për çka tani është lider për përpunimin e dyerve dhe dritareve nga PVC, si dhe e të gjitha llojeve të përpunimit të xhamit.

Zgjedhja e veçantë e materialeve, si dhe teknologjia e lartë punues, garantojnë jetë të gjatë të produkteve të FMB Group, derisa ofron edhe garancion shumë vjeçar.

Gjithashtu, kjo ndërmarrje së fundmi ka investuar edhe në riciklimin e Polimereve PVC, pet, pp e të tjera.

Ndërkaq, prioritet i kësaj kompanie është krijimi i hapësirave të mrekullueshme me dyer dhe dritare të cilat kombinojnë stilin, funksionalitetin dhe sigurinë.