Faturat e larta, KMDLNJ u rekomandon qytetarëve ta padisin KESCO-n, ZRRE-n dhe KEDS-in
Biznes
Lexohet për: 3 min.
4 muaj më parë
Linku u kopjua

Këshilli për Mbrojtjen e të Drejtave e të Lirive të Njeriut (KMDLNJ) të martën u ka rekomanduar qytetarëve konsumator që ta padisin KESCO-n, Zyrën e Rregullatorit të Energjisë (ZRRE) dhe KEDS-in për shkak të faturave të larta për energjinë elektrike gjatë muajit dhjetor 2023.

Në njoftimin për media të KMDLNJ thuhet se muajin e kaluar (dhjetor) faturat për rrymën e pa-shpenzuar ishin të kripura; deri 400 për qind më të larta se të muajit paraprak.

“KMDLNj-ë ka rekomanduar qytetarët e Kosovës të ankohen dhe të paguajnë vetëm shumën e muajit paraprak. Para sporteleve të KEDS janë krijuar radhë të gjata të qytetarëve që po ankohen për këto fatura jonormale dhe pritjet janë disa orëshe. Reagimet e KEDS, KESCO janë reagime të hajdutëve të zënë në vepër ndërsa reagimi i Qeverisë së Kosovës është oportunist dhe i pamoralshëm”, thuhët në reagim.

Sipas KMDLNJ thuhet se ZRrE do të duhej ta kryente mandatin e rregullatorit e jo të vihet në anën e operatorit keqbërës që keqpërdorë buxhetin e qytetarëve të Kosovës në baza etnike dhe politike, që nga përfundimi i luftës e deri më sot.

“Për këtë kemi një vendim të Gjykatës kompetente që ka urdhëruar zhdëmtimin e konsumatorëve për mjetet që janë siguruar përmes fryrjeve të faturave me qëllim të shlyerjes së borxheve për serbët dhe të tjerët në veri të Kosovës. KMDLNj rekomandon qytetarët e Kosovës të këmbëngulin në realizimit e të drejtave të tyre që t'u kthehen mjetet për aq kohë sa janë dëmtuar duke kërkuar edhe përgjegjësi ligjore për ata që e kanë planifikuar, e kanë lejuar dhe e kanë zbatuar këtë keqpërdorim. Adresa e përgjegjësisë është ZRrE”, thuhet në komunikatë.

Sipas KMDLNJ-së qytetarët duhet të kërkojnë rishikimin e faturave të fundit duke mos u mjaftuar vetëm me kundërshtim verbal.

“Qytetarët duhet të organizohen në mbrojtje të drejtave të tyre duke protestuar deri në realizim të këtyre të drejtave dhe të kërkojnë përgjegjësi për shpërdoruesit. Për shkak të përsëritjes të keqpërdorimeve qytetarët duhet të kërkojnë shkëputjen e kontratës me KEDS ashtu si ka ndodhur në vende të tjera ku qeveritë kanë mbrojtur interesin e qytetarëve përkatësisht të konsumatorëve”, thuhet në njoftim.

Në reagimi thuhet po ashtu se ky mbifaturim i muajit të fundit nuk duhet të tolerohet dhe të kalojë pa një përgjigje të vendosur të qytetarëve aq më parë që Kosova është i vetmi vend në rajon por edhe më gjerë ku faturimi i rrymës nuk bëhet në bazë të asaj se sa keni shpenzuar por se cilit komunitet etnik i takoni ku shqiptarët, si shumicë absolute, diskriminohen në mënyrë dhe përmasa absolute. “E për çfarë të drejta kushtetuese dhe barazi para ligjit mund të flasim”, thuhet në fund të reagimit.

A do te jetë qeveria e ardhshme VV-PDK?
Po
Jo
Nuk e di
Voto
4
Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024