Kujdestaria e barnatoreve: Mbi 30 protestojnë sot me kërkesën për ndryshim të rregullores
Tema
Lexohet për: 3 min.
6 muaj më parë
Linku u kopjua

Pesë barnatore në gjithë kryeqytetin qëndrojnë të hapura gjatë natës, nga e hëna deri të shtunën. Ndërkaq, të dielën dhe festave janë dhjetë barnatore kujdestare. Ky projekt i cili ka nisur të zbatohet në Prishtinë rreth një muaji më parë, po kritikohet nga qytetarët. Përveç tyre, mbi 30 barnatore sot po protestojnë me kërkesën që të ndryshohet kjo rregullore. Në shenjë pakënaqësie të njëjtat kanë hapur barnatoret, por pa shitur barna.

Me dhjetëra barnatore në kryeqytet kanë autorizuar një avokat për të parashtruar kërkesë në Komunën e Prishtinës për ndryshimin e kësaj rregullore.

“Në shenjë pakënaqësie për faktin se jemi vënë në pozitë te aktit të kryer, barnatoret e paraqitura në kërkesë do të organizojnë protestë ditën e diel datë 19.11.2023, duke i hapur barnatoret por duke mos shitur barna, dhe atë çdo të diele deri në ndryshimin e kësaj rregulloreje dhe rikthimin e orarit të vjetër. kjo shkresë është njoftim për protestë. Kjo rregullore madje ashpërson gjobat ndaj bizneseve-barnatoreve prandaj është në kundërshtim me parimin kushtetues të proporcionalitetit në raport me dëmin që i shkaktohet shtetit prandaj ankuesit presin që komuna të mos shqiptoj gjoba për protestën e organizuar nga barnatoret ankuese”, thuhet në shkresën e dorëzuar dy ditë më parë.

Drejtori i Shëndetësisë në Prishtinë, Izet Sadiku thotë për KosovaPress, se vet qytetarët janë ankuar që nuk ka barnatore të hapura 24 orë në kryeqytet. Ai shprehet se janë mbi 150 barnatore që kanë pranuar të jenë kujdestare.

Sipas tij, deri më tani 90 për qind të barnatoreve e kanë zbatuar këtë rregullore.

Sadiku shton se në kuvendin komunal mund të bëhen plotësim-ndryshimet.

Drejtori i Shëndetësisë në Komunën e Prishtinës pranon që kujdestaria e barnatoreve nuk është mirëpritur nga të gjithë qytetarët.

Edhe vet qytetarët ankohen për këtë rregullore. Hakif Mehmeti thotë se është çuditur kur ka dëgjuar për këtë orar të barnatoreve.

Vesel Veseli thotë se po ka vështirësi që të gjej të barnatore të hapura. Ai shprehet kritik për këtë vendim që është marrë nga Komuna e Prishtinës.

Por, ka qytetarë të tjerë të cilët pajtohen me këtë rregullore, që përcakton kujdestaritë e barnatoreve gjatë natës. Bislim Ademi thotë se të njëjtën praktikë e ka hasur edhe në vendet e rajonit.

Zbatimi i orareve sipas rregullores nga barnatoret e kryeqytetit ka nisur më 23 tetor.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024