​Ish-avokatja e Trump pranon fajësinë në çështjen e zgjedhjeve në Xhorxhia
Bota
Lexohet për: 4 min.
6 muaj më parë
Linku u kopjua

Ish-avokatja e Donald Trump, Sidney Powell, është deklaruar fajtore për gjashtë akuza në çështjen e ndërhyrjes në zgjedhjet në shtetin federal amerikan Xhorxhia.

Powell, e cila bëri pretendime të rreme për rezultatet e zgjedhjeve të vitit 2020, arriti një marrëveshje me prokurorët dhe tani do të dëshmojë në gjyq, raporton BBC.

Në këtë rast janë 19 të bashkëpandehur, përfshirë edhe ish-presidentin. Ajo u përball me akuzat e komplotit për të kryer ndërhyrje të qëllimshme në detyrat zgjedhore.

Në këmbim të dënimit të saj prej gjashtë vitesh lirim me kusht, Powell duhet të dëshmojë me vërtetësi në gjyqet e ardhshme.

Kjo është një fitore e madhe për prokurorët, duke pasur parasysh përfshirjen e saj në luftën e Trump për të përmbysur rezultatet zgjedhore.

Powell e pranoi fajësinë në një sallë gjyqi në qendër të qytetit të Atlantës të enjten, një ditë para se të fillonte gjyqi i saj.

Prokurorët e kanë akuzuar atë se ishte në mesin e një grupi zyrtarësh dhe mbështetësish të Trump që shkelën sistemin zgjedhor në Coffee County rurale, Xhorxhi, në janar të vitit 2021.

Ata po përpiqeshin të bindin zyrtarët dhe votuesit se zgjedhjet ishin manipuluar disi kundër Trump.

Prokurorët kishin thënë se ajo komplotoi për të manipuluar me makineritë e votimit, fletëvotimet elektronike dhe të dhënat e votuesve, për t'i marrë fletëvotimet nga një vendvotim dhe për të ndaluar një punonjëse zgjedhore të bënte punën e saj.

Ish-avokatja e Trump ishte një nga mbështetëset më të dukshme dhe më të zëshme të pretendimeve të rreme të Trump për zgjedhjet e vitit 2020. Ajo u shfaq veçanërisht në një konferencë shtypi me avokatë të tjerë të Trump në nëntor të vitit 2020, ku pretendoi, pa prova, se makinat e votimit në SHBA - të drejtuara nga Dominion Voting Systems - mund të hakohen për të "marrë një përqindje të caktuar votash nga presidenti Trump dhe t’ia vendosnin ato presidentit (Joe) Biden”.

Në një takim në Shtëpinë e Bardhë një muaj më vone, Trump mendoi të emëronte Powell-in si një këshilltare speciale për të "hetuar akuzat për mashtrim të votuesve në Xhorxhi dhe gjetkë", thanë prokurorët.

Dominion ka paditur Powell-in për shpifje, duke kërkuar 1.3 miliardë dollarë (1.7 miliardë funte) si dëmshpërblim.

Trump është deklaruar i pafajshëm në rastin e tij të mashtrimit zgjedhor në Xhorxhi.

Në total, ish-presidenti përballet me 13 akuza për krime - duke përfshirë shantazhin - për presionin e dyshuar të zyrtarëve të Xhorxhisë për të ndryshuar rezultatet e zgjedhjeve presidenciale të vitit 2020 në atë shtet.

Ai vazhdimisht ka mohuar çdo keqbërje dhe e ka përshkruar rastin si të motivuar politikisht.

Powell është personi i dytë në mesin e të pandehurve që u deklarua fajtor në çështjen e ndërhyrjes në zgjedhjet e Xhorxhisë.

Scott Hall arriti një marrëveshje me prokurorët për pranimin e fajësisë në fund të shtatorit. Ish-vëzhguesi republikan i sondazheve akuzohet gjithashtu për përpjekje për të fituar qasje në pajisjet e ndjeshme zgjedhore në Coffee County, Xhorxhi. Si pjesë e marrëveshjes për pranimin e fajësisë, ai u dënua me pesë vjet lirim me kusht. Atij i kërkohet gjithashtu të dëshmojë kundër të tjerëve në gjyqet e ardhshme.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024