​​Projekti FIERC, vlerësohen nismat rinore që nxisin bashkëpunimin ndëretnik
Lajme
Lexohet për: 8 min.
7 muaj më parë
Linku u kopjua

Është bërë prezantimi i gjashtë projekteve komunitare të mbështetura nga projekti “Nxitja e pajtimit dhe bashkëpunimit ndëretnik” (FIERC), i cili ka për qëllim të nxisë bashkëpunimin ndëretnik.

Një nga objektivat kryesore të këtij projekti është promovimi i angazhimit të të rinjve dhe bashkëpunimi përmes projektit "Skema e mbështetjes për zhvillimin dhe bashkëpunimin e të rinjve” (YDCSS), e cila përfshin mbështetje për gjashtë ide projektesh ose nisma fillestare të udhëhequra nga të rinjtë në moshë madhore nga Kosova, shqiptare dhe serbe, me grant maksimal prej 1500 eurosh për projekt.

I pranishëm në këtë ceremoni prezantimi ishte edhe ambasadori i Gjermanisë në Kosovë, Jorn Rohde.

Rohde tha se projekti ka të bëjë me tejkalimin e ndarjeve dhe krijimin e lidhjeve ndërmjet grupeve etnike shumicë dhe joshumicë në Kosovë duke u angazhuar në mënyrë aktive në nivelin e komunitetit.

Sipas tij, ka nevojë urgjente për iniciativa që promovojnë dhe avancojnë konkretisht bashkëpunimin ndëretnik.

“Sot jemi këtu për të shënuar një tjetër sukses të jashtëzakonshëm të projektit FIERC, një iniciativë e udhëhequr nga QKSS dhe NSI, dy organizata të cilat ne kemi punuar pa u lodhur për të promovuar bashkëpunimin ndëretnik dhe janë mbështetur prej kohësh edhe para kohës sime nga Ambasada Gjermane. Në thelbin e tij, projekti ka të bëjë me tejkalimin e ndarjeve dhe krijimin e lidhjeve ndërmjet grupeve etnike shumicë dhe joshumicë në Kosovë duke u angazhuar në mënyrë aktive në nivelin e komunitetit, duke nxitur besimin e ndërsjellë, duke ndërtuar dhe krijuar mundësi për komunitetet që të adresojnë kolektivisht sfidat me të cilat përballen. Ne i kushtojmë rëndësi të madhe këtij projekti sepse ka nevojë urgjente për iniciativa që promovojnë dhe avancojnë konkretisht bashkëpunimin ndëretnik. projekti FIERC qëndron si një shembull i asaj që mund të arrihet duke punuar së bashku, përmes ndjeshmërisë dhe vendosmërisë”, tha Rohde.

Rohde beson se iniciativa ndër komunitare mund të jetë një katalizator i fuqishëm për zhvillim dhe rritje të mëtejshme në Kosovë.

“Një nga arritjet kryesore të projektit qëndron në suksesin e tij në ndërtimin dhe fuqizimin e kapaciteteve lokale për bashkëpunim ndëretnik. Përmes iniciativave si Forumi i Komunitetit për Interes Publik, projekti i ka fuqizuar komunitetet që të marrin përsipër çështjet në komunitet dhe këto forume e kanë bërë këtë. Në të gjithë Kosovën ka projekte që janë identifikuar dhe zbatuar nga këto forume, por ndikimi i këtij projekti nuk ndalet këtu. Ne jemi këtu për të mbështetur gjashtë ide projektesh ose iniciativa startup të udhëhequra nga ju, të rinjtë nga Kosova, si nga komuniteti shqiptar ashtu edhe serb. Unë besoj fuqimisht se këto startup-e dhe iniciativa ndër komunitete mund të jenë një katalizator i fuqishëm për zhvillim dhe rritje të mëtejshme në Kosovë. Dua t'i përgëzoj të gjithë për suksesin e projektit FIERC”, tha Rohde.

Rohde në fund ka falënderuar Qendrën Kosovare për Studime të Sigurisë (QKSS) dhe iniciativat e reja sociale që vazhdojnë të ushqejnë frymën e bashkëpunimit dhe besimit ndërmjet komuniteteve.

Në fjalën e tij, drejtori ekzekutiv në Qendrën Kosovare për Studime të Sigurisë (QKSS), Mentor Vrajolli shpreson që ky projekt do të rezonojë me shumë organizata të ndryshme, në mënyrë që të shihet se promovimi i ideve të bazuara në komunitet është thelbësor në këtë situatë kritike politike.

“Ne shpresojmë që ky projekt do të rezonojë me shumë organizata të ndryshme, shumë akterë të ndryshëm dhe të shohim se promovimi i ideve të bazuara në komunitet është thelbësor në këtë situatë kritike politike ku për fat të keq janë të pranishme përpjekjet për prishje dhe përçarje në mes të komuniteteve. Dhe shpresojmë që ky projekt të ketë jehonë edhe ndaj faktorëve politikë që janë shumë të rëndësishëm, marrëdhëniet ndëretnike janë shumë të rëndësishme dhe shpresojmë që ajo që pamë gjatë kësaj jave të mos përsëritet kurrë më. Prandaj faleminderit për pjesëmarrjen në projekt. Një falënderim i madh edhe në këtë drejtim shkon për Ambasadën Gjermane për mbështetjen e vazhdueshme”, tha Vrajolli.

Ardita Xhemajli, menaxhere e projektit, tha se vetëm duke punuar së bashku mund të arrihet një ardhme më e mirë për vendin.

“Mirënjohja jonë shkon edhe për Ambasadën Gjermane, për mbështetjen e tyre në këtë projekt dhe për partnerin tonë QKSS për bashkëpunimin e tyre. Ngjarja e fundit në Kosovë ka nënvizuar rëndësinë e bashkëpunimit dhe unitetit, dhe përballë këtyre sfidave aftësia jonë për t'u bashkuar në të gjitha komunitetet, për të mbështetur iniciativa si ato që po mbështesim sot, bëhet edhe më jetike. Kështu që edhe një herë, do të doja t'ju falënderoja të gjithëve që u bashkuat me ne sot. Dhe do të thosha të vazhdojmë të punojmë së bashku për një të ardhme më të mirë në Kosovë”, tha Xhemajli.

Ndërkaq, përfituesit ndërsa falënderuan organizatat për mbështetje, prezantuan në pika të shkurta projektet e tyre.

Eglantina Avdiu nga Mitrovica ka fituar grantin me projektin e quajtur “Multi Tech Craft” që është një iniciativë inovative që fokusohet në fuqizimin e individëve të rinj nga grupet multietnike në fushat e projektimit, programimit dhe funksionimit të makinerive prerëse me laser.

“Kjo besoj se do të tregojë se nëse i kemi mundësitë dhe mjetet, rinia e Kosovës është kreative dhe mund të sjellë zgjidhje kuptimplote. Pra, projekti quhet Multi Tech Craft dhe është një iniciativë inovative e cila fokusohet në fuqizimin e individëve të rinj nga grupet multietnike në fushat e projektimit, programimit dhe funksionimit të makinerive prerëse me laser. Pra, qëllimi kryesor i projektit është të ofrojë mundësi të barabarta dhe mbështetje për të ushqyer kreativitetin dhe aftësitë teknike digjitale të të rinjve nga komunitete të ndryshme në Mitrovicë... Pra, përmes këtij projekti, ne synojmë të forcojmë marrëdhëniet ndërmjet komuniteteve dhe të ndërtojmë një kulturë bashkëpunimi dhe respekti për dallimet kulturore. Dhe në përfundim, projektet tona në përgjithësi synojnë të krijojnë një mjedis inkurajues për të rinjtë multietnikë, duke u mundësuar atyre të eksplorojnë inovacionin, të ndërtojnë marrëdhënie të forta ndërmjet komuniteteve dhe të promovojnë kulturën dhe identitetin e tyre, pasi lojërat do të jenë si lojërat tradicionale nga ai vend dhe përmes kësaj ata do të ndërtojnë një bashkëpunim ndëretnik”, tha Avdiu.

Edhe Milena Lazareviq nga Gracanica prezantoi projektin e saj që përfshin 6 ditë aktivitete me target vajzat serbe dhe rome për tema si dhuna në familjare, për HIV/AIDS si dhe një fushatë online për personat me aftësi të kufizuar.

“Ne do të bëjmë 6 ditë aktivitete dhe do të përfshijmë vajzat e rejat nga komuniteti serb dhe rom. Mendoj se qëllimi kryesor në këtë projekt është përmirësimi i njohurive të tyre për të drejtat e grave dhe ne do të bëjmë pesë aktivitete të ndryshme. Aktivitetet e para janë gjatë Ditës Ndërkombëtare kundër Dhunës ndaj Grave. Do të kemi një aksion rrugor ‘Red shoes’ ku do të vendosim këpucët e kuqe para stacionit policor në Graçanicë dhe do ta bëjmë këtë edhe në lagjen e romëve sepse atje ka shumë stereotipe dhe frikë nga gratë nga komunitetet rome për të folur për dhunën në familje. Aktiviteti i dytë ka të bëjë me HIV/AIDS, dhe do të flasim për problemet dhe do t'u japim më shumë informacion për parandalimin dhe cili është problemi në komunitetin tonë, pse nuk flasim më shumë për të. Dita e dytë është Dita Ndërkombëtare e Personave me Aftësi të Kufizuara, ne do të bëjmë një fushatë online përmes rrjeteve tona sociale dhe gjithashtu do të bëjmë aksionin ‘Cap for the handicap’”, tha Lazareviq.

Përzgjedhja e gjashtë projekteve fituese u bazua në një proces të hapur dhe konkurrues të administruara së bashku nga QKSS dhe SKSH. Një thirrje e hapur u publikua dhe u shpërnda gjerësisht në platforma të ndryshme të mediave sociale gjatë gushtit dhe shtatorit, duke ftuar të rinj nga komunat Graçanicë, Kamenicë, Lipjan, Mitrovicë e Jugut, Shtërpca dhe Viti, të paraqesin projekt idetë e tyre.

Ndërkaq, për të siguruar një proces më gjithëpërfshirës, afati i aplikimit u zgjat dy herë. Projektet iu nënshtruan një vlerësimi rigoroz kundër kritereve të thirrjes nga QKSS dhe NSI, duke rezultuar në përzgjedhjen e këtyre gjashtë fitues .projektet.

Nismat janë planifikuar të zbatohen deri në fund të vitit 2023. Në total, projekti FIERC do të të ndau 9,000 euro./KosovaPress/

Kush do ti fitojë zgjedhjet në Kosovë?
VV
PDK
LDK
AAK-Nisma
Lista GUXO
Nuk e di
Voto
1,531
Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024