Doli nga shtypi monografia “Jeta akademike në Mitrovicë (1961 -2023)” e Ahmet Jasharit
Kulturë
Lexohet për: 2 min.
7 muaj më parë
Linku u kopjua

Ka dalë nga shtypi monografia “Jeta akademike në Mitrovicë (1961 -2023)”, e autorit, Ahmet Jashari, që është botuar nga Universiteti “Isa Boletini” në Mitrovicë (UIBM).

Monografia është botuar me rastin e 62–vjetorit të jetës akademike në Mitrovicë si dhe 10-vjetorit të Universitetit “Isa Boletini” në Mitrovicë.

Çështjet në të cilat është fokusuar autori janë trajtuar në rrafshin tematik dhe kronologjik. Në rrafshin formal janë strukturuar në dy pjesë, në kapituj, nënkapituj dhe njësi të tjera më të vogla, shkruan KosovaPress.

Në pjesën e parë trajtohet hollësisht veprimtaria e Shkollës së Lartë Teknike (SHLT), e Fakultetit të Shkencave Teknike (FSHT) dhe e Fakultetit Xehetaro-Metalurgjik (FXM) përgjatë një periudhe kohore 50-vjeçare si pjesë e Universitetit të Prishtinës (UP).

Në pjesën e dytë autori fokusohet te veprimtaria 10-vjeçare (2013-2023) e Universitetit “Isa Boletini” në Mitrovicë, por gama e çështjeve që trajton është shumë më e gjerë.

Monografia hapet me fjalën e rektorit, hyrjen, një vështrim të shkurtër për Mitrovicën, për arsimin shqip në Mitrovicë dhe për arsimin e lartë në Kosovë, kurse mbyllet me përfundimin, përmbajtjen, listën e figurave, shkurtesat, burimet dhe literaturën, si dhe një biografi e shkurtër e autorit.

Monografia për jetën akademike në Mitrovicë, përveç tjerash, është edhe një lloj mirënjohje për të gjithë ata që kanë kontribuar në mënyra të ndryshme, qoftë ish-drejtues, mësimdhënës, studentë apo punëtorë të administratës së atyre institucioneve. Është një epokë e ndërtuar me sakrifica, meqë pengesat kanë qenë të mëdha.

Redaktor i monografisë është, PhD(c) Miftar Kurti, recensentë: Arben Veselaj dhe Milaim Shefkiu, ndërsa lektor, Alfred Beka./A. Damati

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024