Drenicaku që pajtoi mbi 20 familje dhe shkroi qindra ngjarje lufte në ditar
Intervista
Lexohet për: 3 min.
5 muaj më parë
Linku u kopjua

“Pas plagosjes së ushtarit Gani S Uka në oborrin e vet, Mustafa ishte përpjekur dhe e kishte tërhequr Ganiun, por kur kthehet në shtëpi i gjen të vrarë: nënën, gruan dhe dy vajzat 10 dhe 12 vjeçare”. Kjo është vetëm një copëz ngjarjeje e shkëputur nga ditari qindra fletësh i 75 vjeçarit, Jahë Jusufi nga fshati Plluzhinë i Komunës së Skenderajt, ditar ky që përgjatë pesë vjetëve ka ngërthyer në vete mijëra ngjarje të luftës e të pajtimit të gjaqeve, që tani ngjallin emocion e ngazëllim, kur kujtohen nga vetë autori.

Jusufi ndan për KosovaPress, një pjesë nga ditari në të cilën përmend edhe arsyen se pse ka vendosur të mbledhë shënime.

“Edhe tri viktima në prag të lirisë”, titullohet ngjarja tjetër që “shtrihet”, në ditarin e Jususfit. Ngjarje kjo që tregon për vrasjen e disa personave nga forcat serbe më 11 qershor të vitit 1999.

Ani pse në moshë të shtyrë dhe me pengesa në të folur, për shkak të sulmit në zemër pesë vite më parë, Jusufi nuk përton që me nostalgji t’i shfletojë faqet e ditarit, i cili daton që nga viti 1995, duke treguar për një situatë që një bashkëvendas i tij kishte gjetur të vrarë gjysmën e familjes.

Këto shkrime që secila nga to përmban një ngjarje dhe emocion në vete, janë të veçanta për Jusufin, prandaj ai shpreh dëshirën që t’i publikojë si libër në të ardhmen.

Ai tregon se si kishte filluar pasioni i tij për të shkruar ditarë dhe kujton fatin e dy ditarëve paraprak. Njëri i djegur në grazhë gjatë luftës dhe tjetri në Këshillin Lokal të Emergjencës në Likofc, ku edhe kishte punuar.

Jusufi, jo rastësisht përmendi pajtimin e gjaqeve si pjesë të shkrimeve të tij. Kjo pasi, ai bashkë me Anton Çettën, Muharrem Dërgutin dhe Idriz Rrecin ishin faktorët për pajtimin e gjaqeve të mbi 20 familjeve, në fshatrat Aqarevë, Abri, Ticë, Plluzhinë dhe Likofc gjatë vitit 1990.

Aktivitetin në pajtimin e gjaqeve, Jusufi tregon se e kishte filluar pasi ishte liruar nga burgu, që ishte arrestuar për nxitje te nacionalizmit shqiptar përmes shkrimeve dhe temave.

Një ngjarje tjetër që fle në faqet e ditarit “Shkrime të Shkapërderdhura”, që është e fundit, por jo nga rëndësia, ka të bëjë me kontributin e tij mbi 43 vjet në fushën e arsimit.

Veterani i arsimit, përderisa ndau për Kosova Press një ngjarje interesante që i kishte ndodhur gjatë kohës kur po jepte mësim, u shpreh se po ta dinte që nxënësit dhe prindërit do e vlerësonin aq shumë, ai do të punonte edhe më shumë.

Jusufi tregon se edhe tash që ka dalur në pension, ende po merret me shkrime, dhe se leximi i veprave është pjesë e pandashme e jetës së tij.

Për fund, veterani i arsimit u shpreh se libri “Të bëhesh”, i autores Michele Obama dhe prozat e Kadaresë janë të preferuarat e tij./Z.Zeneli/

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Të gjitha të drejtat e rezervuara nga A.P.L. KosovaPress © 2002-2024