Aliu: Kyçja e Kosovës në korridorin 10 nga Bujanoci, prioritet i lartë i Qeverisë
Lajme
Lexohet për: 2 min.
1 vit më parë
Linku u kopjua
Ministri i Mjedisit, Planifikimit Hapësinor dhe Infrastrukturës, Liburn Aliu ka paralajmëruar se pas përfundimit të autostradës së Gjilanit, do të vazhdojnë me projektin në drejtim të Luginës së Preshevës. Derisa për projektin Prishtinë-Pejë, Aliu thotë se ka ndryshuar nga ai fillestar, pasi ka qenë me devijime të shumta.
Ministri Aliu në një konferencë për media tha kyçja nga Prishtina përmes Gjilanit, në Dheun e Bardh dhe në korridorin 10 përmes Bujanocit, është prioritet i lartë i Qeverisë së Kosovës.
“Me të arritur përfundimin e pjesës së autostradës deri në Gjilan, do të vazhdojmë menjëherë me fillimin e projektit dhe analizën për të filluar me procedura të shpronësimit dhe me realizim të projektit deri te Dheu i Bardh. Kyçja nga Prishtina përmes Gjilanit, në Dheun e Bardh dhe në korridorin 10 përmes Bujanocit, është prioritet i lartë i Qeverisë së Kosovës”, tha ai.
Ai tha se po vazhdon procedura e prokurimit për projektin Prishtinë-Pejë dhe gjithçka është duke shkuar në rregull.
Aliu është pyetur edhe për çështjen e menaxhimit të mbeturinave.
Sipas tij, vërshimet treguan se deponitë ilegale gjithandej në vend janë shumë prezentë.
Në fund, Aliu tha se punimet për zgjerimin e rrugës Prishtinë-Mitrovicë, përkatësisht në fshatin Babimic, kanë nisur, megjithatë nuk dha detaje se si do të vazhdojnë.