13-vjetori i pavarësisë, Ruçi uron Osmanin: Shqipëria mbështet dialogun ndërmjet Kosovës e Serbisë

13-vjetori i pavarësisë, Ruçi uron Osmanin: Shqipëria mbështet dialogun ndërmjet Kosovës e Serbisë

Kryetari i Kuvendit të Shqipërisë Gramoz Ruçi i ka dërguar një mesazh urimi homologes së tij Vjosa Osmani, me rastin e 13-vjetorit të pavarësisë së Kosovës.

Ruçi, i ka dërguar sot një letër urimi Osmanit, ku thekson se shpallja e pavarësisë së Kosovës më 17 shkurt 2008 ishte kurorëzimi i përpjekjeve të popullit dhe institucioneve të Kosovës për liri, sovranitet e drejtësi.


“Me rastin e 13-vjetorit të pavarësisë së Republikës së Kosovës, ju dërgoj urimet më të përzemërta të Kuvendit të Shqipërisë dhe të miat personalisht. Shpallja e pavarësisë së Kosovës më 17 shkurt 2008 ishte kurorëzimi i përpjekjeve të popullit dhe institucioneve të Kosovës për liri, sovranitet e drejtësi. Kosova e pavarur është rezultat i Kosovës së lirë. Liria e Kosovës është rezultat i luftës çlirimtare të UÇK-së, me mbështetjen e popullit të Kosovës dhe në partneritet me aleatët e mëdhenj e strategjikë të Shqipërisë, Shtetet e Bashkuara të Amerikës dhe NATO-n”, shkruan Ruçi.

Ai ka shprehur bindjen se rezultatet e zgjedhjeve të 14 shkurtit do të prodhojnë institucione të forta e të qëndrueshme, të afta për të përballuar sfidat e mëdha e të vështira të Republikës së Kosovës dhe qytetarëve të saj.

“Në këtë mision fisnik, Ju garantoj se Kuvendi dhe institucionet e Republikës së Kosovës do të kenë, si edhe më parë, mbështetjen e Kuvendit dhe institucioneve të Shqipërisë. Shqipëria ka përshëndetur marrëveshjen e fundit ndërmjet Kosovës dhe Serbisë, të lehtësuar nga ShBA, mbështet dialogun midis të dy vendeve, ndërmjetësuar nga BE, si edhe qëndrimin e Presidentit Biden se thelbësore për ecjen përpara të të dy vendeve është një zgjidhje gjithëpërfshirëse, drejt njohjes së ndërsjellë, e cila do të ruajë sovranitetin dhe integritetin territorial të të dyja shteteve dhe do të avancojë aspiratat për anëtarësim në Bashkimin Evropian”, -thuhet në telegramin e urimit./tch

Lexo edhe

Video

error: