Ish-kryeministri i Kosovës, Avdullah Hoti ka deklaruar se me ardhjen në pushtet të Qeverisë Kurti II ka humbur sovraniteti në veri të Kosovës. Ai ka paralajmëruar se me këtë sjellje të kryeministrit, vendi mund të vijë në një situatë kur në veri, rendi dhe ligji të vendoset nga KFOR-i dhe EULEX-i, e jo nga Policia e Kosovës.
Ai thotë se në 30 vite të përpjekjeve të shqiptareve për shtet të pavarur dhe 15 vite pas pavarësisë, kurrë nuk ka pas një komunikim të tillë mes Qeverisë Kosovës dhe Qeverisë së SHBA-së, me ç’rast thekson se gjendja është kritike.Hoti thotë i druhet edhe një situate tjetër kur KFOR-i dhe EULEX-i të kujdesen për rendin dhe ligjin në veri të vendit. Sipas tij, kjo do të ishte e rëndë.
Pezullimi i Kosovës nga stërvitja ushtarake “Defender Europe ‘23” për Hotin është një mesazh ogurzi për Republikën.
Në Zveçan, Zubin Potok dhe Leposaviq, serbët po protestojnë duke kundërshtuar hyrjen e kryetarëve të rinj shqiptarë në objektet komunale, si dhe praninë e Policisë së Kosovës. Si pasojë e veprimeve të protestuesve kanë mbetur të lënduar 6 policë dhe 30 pjesëtarë të KFOR-it. Gjithashtu, janë djegur dhe dëmtuar vetura të Policisë së Kosovës dhe të mediave.