​Kurti takon mërgimtarët dhe studentët në Zurich

​Kurti takon mërgimtarët dhe studentët në Zurich

Në kuadër të iniciativës së qeverisë për dialog me mërgatën, kryeministri Albin Kurti në dy takime të ndara ka takuar mërgimtarët dhe studentët shqiptarë që jetojnë e studiojnë në Zurich.

Gjatë një bashkëbisedimi të hapur, Kurti fillimisht ka prezantuar punën, prioritetet dhe sfidat e deritanishme të qeverisjes.

Ai ka theksuar se Qeveria e Kosovës e vlerëson mërgatën si faktor për zhvillimin e vendit dhe synon të rrisë angazhimin e profesionistëve të mërgatës në përpilimin e politikave zhvillimore dhe strategjike, në zbatimin e politikave, si dhe për investime të përbashkëta me ndërmarrjet vendore në Kosovë.


Siç bëhet e ditur nga komunikata për media, Kurti ka vënë theksin te motivimi i mërgatës për të ardhur dhe kontribuar në Kosovë, duke thënë se rritja e ekonomisë në vend dhe përmirësimi i nivelit të arsimit do të realizohet më mirë e më shpejtë duke e sjell ekspertizën profesionale nga mërgata në vendin tonë.

Kryeministri Kurti po ashtu thuhet se iu përgjigj pyetjeve të të pranishmëve rreth strategjisë së re të qeverisë për mërgatën dhe angazhimit të tyre në qëllimet edhe nevojat e institucioneve të vendit, si dhe dëgjoi idetë dhe propozimet e tyre.

Studentët thane që do të dëshironin krijimin e një pike kontakti nëpërmjet së cilës ata do të ofronin vullnetarisht dijen e tyre. Ata kërkuan që t’u njihen kualifikimet e Zvicrës, t’u jepet mundësia që të punojnë dhe të bëjnë hulumtime shkencore në institucione. Po ashtu sugjeruan zgjerimin e mbështetjes financiare për start-up ndërmarrjet.

Duke i falënderuar për pritjen dhe interesimin e shprehur, kryeministri i ka ftuar mërgimtarët që të investojnë në Kosovë, për ndërmarrje fitimprurëse për ta dhe zhvillim edhe më të hovshëm socio-ekonomik për Republikën e Kosovës.

Lexo edhe

Video