Situata aktuale në veri të vendit dhe veprimet e Listës Serbe në Kosovë, sipas kryeministrit të Kosovës Albin Kurti, vinë si pasojë e përpjekjes së Beogradit zyrtar për të ambalazhuar kundërshtimin e nismës franko-gjermane për dialogun Kosovë-Serbi. Kurti ka thënë se Serbia është e interesuar për sabotuar dialogun dhe çfarëdo marrëveshje dhe sipas tij e njëjta ka zgjedhur të bashkëpunojë me grupet kriminale në veri të Kosovës për të kërcënuar qytetarët. Megjithatë, shefi i ekzekutivit ka thënë se Kosova është e përkushtuar për kushtetutshmëri, paqe e siguri dhe nuk do të shantazhohet nga organizimet kriminale.
Shefi i ekzekutivit ka thënë se veprimet e përfaqësuesve politik serb në Kosovë nuk janë për shkak të targave apo Asociacionit.
Kurti përmendi takimet e presidentit të Serbisë me ambasadorin e Rusisë dhe atë të Kinës në Beograd të shtunën, për çka tha se tregon qartë koordinimet me këto dy shtete dhe se i njëjti po zhgënjen Shtetet e Bashkuara të Amerikës dhe Bashkimin Evropian.
“Nuk bëhet fjalë as për tabela të automjeteve as për Asociacionin e komunave me shumicë serbe, as për suspendimin e Nenad Gjuriqit, bëhet fjalë vetëm për refuzimin që ata ia kanë bërë propozimit të Parisit dhe të Berlinit dhe tash duhet ta kamuflojnë këtë refuzim që ja kanë bërë Evropës, që ja kanë bërë BE-së, këtë koordinim të ngushtë që e kanë me Kremlinin dhe me presidentin depostik Putinin, dhe për këtë po i përdorin ata të cilët ende vazhdojnë t’i dëgjojnë në Republikën e Kosovës pra pjesëtarë të ndryshëm të strukturave ilegale”, ka thënë kryeministri i Kosovës, Albin Kurti derisa ka komentuar veprimet e fundit që lidhen me veriun e vendit.
Ai tha se Serbia është e interesuar të sabotojë dialogun dhe çfarëdo marrëveshje.
“Serbia qartazi është e interesuar për ta sabotuar dialogun dhe çfarëdo marrëveshje, dhe rruga që e ka zgjedhur është në bashkëpunim me grupet kriminale në veri të vendit për kërcënimin e qytetarëve dhe sigurisë në vendin tonë. Kjo rrugë nuk ështw e paqes, e bashkëpunimit, e as e ndërtimit të marrëdhënieve të mira ndër fqinjësore për çfarë ne angazhohemi. Përpjekjet e tilla do të jenë të pasuksesshme sepse shteti ynë është i fortë, demokratik, i cili ka rritje ekonomike dhe shoqërore në çdo fushë e aspekt duke qenë njëkohësisht i rreshtuar me Bashkimin Evropian, Shtetet e Bashkuara të Amerikës dhe NATO-n”, ka shtuar ai.
Kurti tha se mbarëvajtja e punës së institucioneve dhe shërbimeve po vijon dhe sipas tij institucionet vartëse të secilës ministri kanë vazhduar pa ndërprerë përmbushjen e detyrimeve.
Ai tha se nga data 1 nëntor e vitit 2022 deri më tani janë shënuar 856 qortime apo vërejtje.
“Karshi thirrjes dashamirëse të institucioneve të Kosovës drejtuar qytetarëve të komunitetit serb për konvertimin e targave nga ilegale në ato RKS ditëve të fundit janë intensifikuar kërcënimet dhe përpjekjet e Serbisë e të presidentit fqinj tonë verior për destabilizim e situatës në vendin tonë dhe këto kërcënime janë praktikisht të orientuara para sw gjithash ndaj qytetarëve të vendit tonë nëpërmjet ngjalljes së frikës e të panikut”, tha Kurti.
Kurti tha se në kuadër të këtij qëllimi të Serbisë dhe përfaqësuesve politik të saj, së fundmi i kanë shtuar edhe aktivitetet kundër Kosovës përfshirë këtu propagandat për hapjen e lajmeve të rreme, inskenim të incidenteve të ndryshme dhe provokimeve të tjera.
“Pasqyrimi mediatik i incidenteve të ndryshme si incidente ndëretnike është bërë përmes deklarimeve nga krerët shtetëror të Serbisë duke synuar të keqpërdorin të shtrembërojnë të dhënat e evidentuara në Policinë e Kosovës, duke u dhënë atyre ngjyrim ndëretnik rasteve ordinere të ndryshme kriminale. Bazuar në të dhënat e institucioneve tona të sigurisë, Serbia ka vazhduar presionin që serbët në Kosovë të paraqitën si të kërcënuar dhe rrezikuar dhe kjo me qëllim që të propagandohet që komuniteti serb është cak i sulmeve të vazhdueshme dhe se ata nuk na paskan siguroi. Serbët në Kosovë janë të rrezikuar nga Beogradi i cili ua djeg veturat, i cili ua djeg shtëpitë, pra asnjë serb nuk dyshon që djegia e veturave a ndodhur nga shqiptarët”, tha Kurti.
Kryeministri i Kosovës tha se bojkoti nuk është zgjidhje ndërkohë i ftoi qytetarët serb të Kosovës që të mos bien pre e manipulimeve politike. / G.Kadrija