​Buxheti 3 miliardësh, kërkohet program i qartë qeverisës dhe mosrritje të tatimeve

Vlera e buxhetit prej 3 miliardë eurosh po konsiderohet ambicioze, por jo edhe e paarritshme nëse luftohet informaliteti ekonomik. Megjithatë, nga Qeveria Kurti po kërkohet program se si mund të arrihet të rritet buxheti i shtetit.

Kryeministri Albin Kurti në mbledhjen e fundit të qeverisë ka paralajmëruar se në ditët në vijim qeveria do ta draftojë programin dhe pastaj do ta paraqesë për shqyrtim në Kuvend.

Kryetari i Odës Ekonomike të Kosovës (OEK), Berat Rukiqi, thotë për KosovaPress, se kjo qeveri për një mandat ka paraparë një buxhet prej 3 miliardë eurosh, mirëpo, ende nuk dihet për format e mbledhjes së këtij buxheti në këtë shumë.

Rukiqi pohon se pa e parë programin qeverisë nuk mund të komentohet rritja e buxhetit të vendit.

Se a pritet të ketë rritje të tatimeve në vend për mbushjen e arkës së shtetit prej 3 miliardë eurosh, kreu i OEK-ut thotë se nëse ndodhë një gjë e tillë, do ta kundërshtojnë si komunitet i bizneseve.


Edhe drejtori ekzekutiv i Klubit të Prodhuesve të Kosovës, Astrit Panxha, thotë se shuma prej 3 miliardë euro për buxhetin e shtetit në mandatin e qeverisë Kurti, është tejet ambicioze për këtë moment, pasi që nuk ka program se si mund të arrihet.

Panxha shton se zhvillimi ekonomik dhe sektori privat, si dhe mbushja e arkës së shtetit, mund të ndodhë duke luftuar informalitetin por edhe duke shkurtuar skemën sociale, që kanë qenë të shpenzuara në atë formë që nuk kanë sjellë efektin e duhur.

Ndërsa, kryeministri Albin Kurti ka theksuar se zyra për planifikim strategjik në Zyrën e Kryeministrit të Kosovës ka pranuar materialin dhe do të shndërrohet në një draft program qeveritar në një mbledhje të veçantë të qeverisë, ku pastaj do të dërgohet në Kuvend për miratim.

Edhe opozita, veçanërisht shefi i grupit parlamentar të PDK-së, Bedri Hamza në ditën kur është zgjedh qeveria e re, ka kritikuar ekspozenë e Kurtit, dhe ka shfaqur dilemën për arritjen e buxhetit prej 3 miliardë euro, pa një program qartë qeverisës.

Lexo edhe

Video

error: