Komente pozitive për koncertin e Ratkocerit

Prishtinë, (Kosovapress) 26 Qershor 2012 15:34

I riu ferizajas, Shaban Ratkoceri, i cili është në prag të përfundimit të studimeve në degën e muzikës në Universitetin e Prishtinës, u ka lënë mbresa dashamirëve të muzikës me koncertin e parë të tij me orkestrime të këngëve popullore. Ky entuziast i muzikës, i cili krahas punës edukative që po bënë me nxënësit e Shkollës së Mesme të Muzikës "Çesk Zadeja” është në rrugë të mirë që t’i prekë majat e suksesit në fushat e ndryshme të muzikës.

Pas koncertit, Shabani, ka thënë për Kosovapress, se ky koncert është i pari i këtij lloji në Ferizaj dhe se ky është vetëm fillimi i një pune që do të vazhdoj edhe në të ardhmen. Ai ka thënë se i ka mbetur edhe pak deri te diplomimi, ndërsa punën me nxënës e ka objektiv parësor, por pa lënë anash edhe anën shpirtërore që i ofron muzika e veçanarisht kompozimin. /Kosovapress/

Te dhjetë këngët e orkestruara nga ai ishin punuar nga profesoresha e muzikës dhe dirigjentja, Lindita Isufi, e cila së bashku me orkestrin, në përbërjen e së cilës ishin nxënës dhe studentë të muzikës nga Ferizaj, dëshmuan se ky qytet gradualisht po e krijon bërthamën e orkestrit të vet artistik.

“Ka qenë vështirë të organizohet ky koncert, për faktin se krahas punës në orkestrimin e këngëve, është dasht të merrem edhe me sigurimin e hapësirës për ushtrime, ngase ende Ferizaj nuk ka një vend ku mund të ushtrohet”, ka thënë Shabani.

Edhe profesoresha Lindita Isufi, ka thënë se është punuar me përkushtim në përgatitjen e këtij koncerti me çka ka falënderuar instrumentistët por edhe profesor Shabanin për punën e mirë që ka bërë. “Edhe përkundër kushteve dhe vapës është punuar mirë. Po dëshmohet se gradualisht edhe Ferizaj ka hyrë rrugës së krijimit të orkestrit artistik”, ka thënë profesoresha, Lindita Isufi.

Fjalë të mira për këtë koncert kanë dhënë edhe kolegë të Shabanit, duke thënë se te ky krahas talentit po shihet edhe entuziazmi dhe përkushtimi për muzikën.

“Koncerti dëshmoj një punë të mirë të bërë nga Shabani dhe një përkujdes brilant të profesoreshës Linditë. Po shihen rezultatet. Ferizaj, gradualisht po e krijon identitetin e vet të orkestrit dhe muzikës artistike”, ka thënë me këtë rast profesori i muzikës, Astrit Mustafa.

I relaksuar pas koncertit të suksesshëm, Shabani, thotë se ka plane edhe për aktivitete të tjera, pa i zbuluar ato, por që publiku ferizajas do të njihet me kohë.

Ndryshe, në koncertin me orkestrime të këngëve popullore, u ekzekutuan dhjetë këngë popullore nga tradita, si “Valsi i lumturisë”, “Moj e bukura more”, “Një lule”, “O zambak i Prizrenit” etj., ndërsa më e pëlqyera nga publiku mbeti “Baresha” e Rexho Mulliqit. /Kosovapress/