Mirënjohje për nxënësit e suksesshëm

Mitrovicë, (Kosovapress) 29 Qershor 2012 16:19

Zyrtarë komunalë të prirë nga numri një i qytetit Avni Kastrati, kanë pritur të premten rreth 100 nxënës të shkollave fillore, të cilët janë shquar me suksese në lëmi të ndryshme gjatë këtij viti shkollor. Ata kanë ndarë mirënjohje për nxënësit dhe shkollat që janë dalluar në aktivitete të ndryshme, si kuize diturie, sport, kulturë etj.

Kryetari Kastrati i ka uruar për sukseset e arritura dhe ka premtuar mbështetje të pakursyer. “Ju jeni e ardhmja e sigurt e këtij vendi dhe këtij qyteti, andaj do ta keni përkrahjen tonë të pakursyer”, ka thënë Kastrati.

Ndërsa, Ali Bejta, drejtor për Arsim, tha se ky vit shkollor në Mitrovicë ka qenë shumë i suksesshëm. Ai potencoi rezultate të dalluara në shumë lëmi, të cilat e kanë bërë Mitrovicën të ndjehet krenare më këtë potencial që ka.

Ai tha se për nder të këtyre sukseseve, sivjet për herë të parë është organizuar edhe “Marshimi i shembullorëve” nëpër rrugët e qytetit. “Sivjet e kemi nisur një aktivitet që mëtojmë të jetë tradicional dhe që është mirëpritur shumë nga qytetarët”, tha Bejta. /Kosovapress/