Tuneli i Kalimashit në terr

Tiranë, (Kosovapress) 02 Qershor 2012 21:33

Operatori i Sistemit të Transmetimit, bëri të ditur sot se për shkak të punimeve në disa linja në zonën e Veriut gjatë javës së ardhshme do ketë ndërprerje të energjisë elektrike.

Sipas tij, në bazë të planifikimit të punimeve për rehabilitimin e linjave në zonën e veriut, javën që vjen, është parashikuar që të kryhen punime në linjën 110 kV të Fushë Arresit, kështu që pa energji do të mbetet edhe tuneli i Kalimashit.

“Për këtë qëllim, duke filluar nga dita e hënë me datë 04.06.2012, deri ditën e enjte më datë 07.06.2012, janë parashikuar që çdo ditë, nga ora 08:00 deri më 18:00 të bëhen stakime edhe në linjat e mëposhtme: Linjës 110 kV Fushë Arres-Kalimash; Linjës 110 kV Kalimash-Kukës dhe Linjës 110 kV Kalimash-Tunel”, thuhet në komunikatë të Operatorit të Sistemit të Transmetimit.